Vashıngtonda Qazaqstan úkimeti men OpenAI kompanıasy arasynda jasandy ıntellekt tehnologıalaryn bilim berý salasyna engizýge baǵyttalǵan yntymaqtastyq týraly memorandýmǵa qol qoıyldy, dep habarlaıdy aqshamnews.kz
Jasandy ıntellekt jáne sıfrlyq damý mınıstrligi, “Qazaqtelekom” AQ, Freedom Holding Corp. jáne OpenAI kompanıasy sıfrlyq bilim berý men bolashaq daǵdylaryn damytý salasyndaǵy uzaq merzimdi seriktestiktiń negizin qalaıtyn kelisimge qol qoıdy.
Memorandýmnyń arqasynda qazaqstandyqtyq muǵalimder úshin ChatGPT Edu platformasy qol jetimdi bolmaq. Bul bilim berý mekemelerine beıimdelgen ChatGPT-tiń arnaıy nusqasy. Atalǵan platforma derekterdiń joǵary deńgeıdegi qaýipsizdigin, ákimshilik baqylaý múmkindigin qamtamasyz etedi jáne aqparatty taldaýǵa, jeke GPT-assıstentter jasaýǵa, sondaı-aq kúndelikti jumystardy avtomattandyrýǵa arnalǵan keńeıtilgen quraldardy qamtıdy.
Úsh jylda qazaqstandyq pedagogterge jyl saıyn keminde 165 000 OpenAI lısenzıasyn berý josparlanyp otyr.
OpenAI ókili Kevın Mıllstiń aıtýynsha, jasandy ıntellektti paıdalaný búkil álem muǵalimderine oqýshylardyń oqýyna jáne damýyna kóbirek kóńil bólýge múmkindik beredi.
“Qazaqstan úkimetimen jasalǵan bul kelisim el muǵalimderine ChatGPT-ti paıdalanyp, jasandy ıntellekttiń artyqshylyqtaryn mektepterge engizýge kómektesedi”, dedi ol.
Atalǵan bastama Qazaqstannyń sıfrlyq transformasıa jáne adamı kapıtaldy damytý jónindegi ulttyq strategıasyn qoldaı otyryp, pedagogterge ozyq halyqaralyq tehnologıalarǵa qol jetkizýge jol ashady. Kelisimdi iske asyrý ınovasıalyq oılaý, synı taldaý jáne kreatıvtilik daǵdylaryn damytýǵa, sondaı-aq pedagogterdiń sıfrlyq quzyretterin nyǵaıtýǵa yqpal etedi.