Qyrǵyzstannyń būrynǵy kúshtík qūrylym basshysy Qamshybek Táshıev taǵy bír lauazymymen qoshtasty, – dep habarlaıdy aqshamnews.kz tílshísí 24.kg-ge sílteme jasap.
Ol ekí jyldan astam uaqyt boıy Qyrǵyz futbol odaǵynyń prezıdentí qyzmetín atqarǵan. 15 sáuír kúní ótken ūıym kongresínde Táshıev atqarylǵan jūmystar boıynsha esep beríp, būl mínberde tóraǵa retínde keıíngí ret sóılep tūrǵanyn jetkízdí.
Onyń aıtuynsha, Qyrǵyzstanda futboldy tabys kózíne aınalǵan sala deuge kelmeıdí. Sondaı-aq ol óz mıssıyasyn oryndaǵanyn aıtyp, endígí jerde būl qyzmetke futboldy shyn súıetín adam keluí kerektígín atap óttí.
Aıta keteıík, būǵan deıín, 10 aqpanda Qamshybek Táshıev Qyrǵyzstan mınıstrler kabınetí tóraǵasynyń orynbasary jáne Memlekettík ūlttyq qauípsízdík komıtetíníń tóraǵasy qyzmetínen bosatylǵan edí. Ol būl lauazymǵa 2020 jylǵy 16 qazanda taǵaıyndalǵan bolatyn.
Keıínírek Qyrǵyzstan prezıdentí Sadyr Japarov Táshıevpen qyzmetten ketkennen keıín jeke kezdeskenín málímdedí. Prezıdenttíń sózínshe, būl sheshím arqyly ol kerísínshe jaqyn serígín saqtap qalǵan. Japarov eger Táshıev qyzmetínde qala bergende, memlekettík apparat íshínde de, qoǵam arasynda da túsínbeushílík pen alauyzdyq kúsheyuí múmkín edí dep túsíndírdí.
Sonymen qatar, Qyrǵyzstan basshysy Qamshybek Táshıevtíń aınalasyndaǵy keıbír adamdar onyń atyn paıdalanyp, túrlí lauazymdy tūlǵalar men qoǵam ókílderíne yqpal etuge tyrysqanyn aıtqan bolatyn.