Úkímet 2029 jylǵa qaraı $400 mlrd jıyntyq ınvestıtsıya tartu arqyly ekonomıkalyq ósudíń jańa modelíne kóshudí qamtamasyz etedí.
Memleket basshysynyń Úkímettíń keńeıtílgen otyrysynda qoıǵan míndetterín júzege asyru tetíkterí turaly Premer-mınıstrdíń orynbasary – ūlttyq ekonomıka mınıstrí Serík Jūmanǵarın bayandady, - dep habarlaıdy Aqshamnews.kz.
Onyń aıtuynsha ūlttyq jospardaǵy boljamdarǵa sáıkes ınvestıtsıyalardyń Jalpy íshkí óńímge qatynasy qazírgí 14–15%-dan 2029 jyly 23%-ǵa deıín ūlǵayady. Nátıjesínde 2029 jyly negízgí kapıtalǵa salynatyn ınvestıtsıyalar 2024 jylǵy deńgeımen salystyrǵanda 2,5 esege artuǵa tıís. Metallurgıya, mūnaı hımıyasy, gaz óndírísí men farmatsevtıkany damytuǵa basty nazar audarylatyn bolady. Memleket ınvestorlardy shaqyruymen ǵana shektelmeı, ekonomıkalyq ósudíń proaktıvtí sayasatyn engízude. Yaǵnı, Úkímettíń ózí jergílíktí bıznestíń qajettílíkteríne «ınvestıtsıyaǵa tapsyrys» qalyptastyrady jáne jańa óndírísterdí íske qosu úshín daıyn tehnologıyalarmen sheteldík seríktesterdí tartady.
Būl sayasattyń mání – memlekettíń tek ınvestorlardy shaqyruymen ǵana shekteletín modelden naqty ınvestıtsıyalyq jobalardy qalyptastyru men íske qosuǵa memlekettíń belsendí qatysuy modelíne kóshu. Investıtsıya tartudyń būl tásílí ekonomıka salalarynyń naqty qajettílíkteríne baǵyttalǵan. Atalǵan jobalardy júzege asyru eldegí eńbek ónímdílígíníń ortasha deńgeıín arttyrady, būl «orta tabys tūzaǵyn» eńseru jáne jan basyna shaqqandaǵy jalpy íshkí ónímníń odan árí ósu úshín qajet negízgí sharttardyń bírí, — dedí vıtse-premer Serík Jūmanǵarın.