Shymkenttegí kópqabatty úıdíń bír podezínde ornalasqan úsh páterden tórt adamnyń máıítí tabyldy, – dep habarlaıdy aqshamnews.kz tílshísí.
Aldyn ala boljam boıynsha, qaıǵyly jaǵdaı gazdan ulanumen baılanysty boluy múmkín.
Qaıǵyly oqıǵa 3 nauryzda kúndíz Shymkent qalasynyń Tūran audanyndaǵy Studenttík qalashyq shaǵynaudanynda bolǵan. Aldyn ala derekke sáıkes, bír podezdegí úsh páterde tórt adam kóz jūmǵan.
Kórshíler bírneshe kún boıy gazdyń ótkír ıísí sezílgenín aıtady. Olardyń sózínshe, bír páterden 31 jastaǵy áıel men 16 jastaǵy jasóspírím qyzdyń máıítí tabylǵan. Ekínshí qabattaǵy taǵy bír páterden 23 jastaǵy jígíttíń jansyz denesí anyqtalǵan. Al úshínshí qabattaǵy jaldamaly páterde 20 jastaǵy student qyzdyń kóz jūmǵany belgílí boldy. Páter ıesíníń aıtuynsha, boıjetkenníń denesí juynatyn bólmeden tabylǵan.
Podezd tūrǵyny Islam Faızullaevtyń málímdeuínshe, aldymen student qyzdyń denesí anyqtalǵan. Onyń aıtuynsha, páter ıesí kelgende juynatyn bólmeníń esígí íshten qūlyptauly tūrǵan, esík ashylǵannan keıín boıjetkenníń juynu kezínde kóz jūmǵany belgílí bolǵan. Oqıǵadan soń uchaskelík polıtsıya shaqyrylyp, tūrǵyndar syrtqa shyǵarylǵan. Keıín qūtqarushylar basqa páterlerdíń esíkterín ashyp, taǵy bírneshe máıít tapqan.
Qazír polıtsıya adam ólímíne ákelíp soqqan qyzmet kórsetu faktísí boıynsha qylmystyq ís qozǵady. Gaz qyzmetí ázírge resmı túsíníkteme bergen joq.
