Esterińizde bolsa, ońtústik astanada «Kóktem kórki – qyzǵaldaq» degen ataýmen qyzǵaldaq festıvali ótken bolatyn. Festıválde qyzǵaldaqtyń jańa «Prezıdent Nazarbaev» surpy tanystyryldy. Bul qyzǵaldaqtyń jańa túrin golandyq seleksıoner Jan Laıthard ómirge ákeldi. Gúlder aldymen Nursultan Nazarbaevqa Nıderlandta ótken Iadrolyq qaýipsizdik samıtine qatysqan kezinde tanystyrylǵan edi.
Atalǵan suryptyń ereksheligi sol – ol óte iri jáne qyzǵylt aqtańdaqtary bar. Boıynyń bıiktigi 70 santımetrge deıin jetetin gúlder kóktemniń úsh aıynda da gúldep turady.
«Jas natýralıser stansıasy» MKQK dırektory Zeınep Arıshevanyń aıtýynsha, «Grın Land» kompanıasy «Prezıdent Nazarbaev» qyzǵaldaǵynyń 10 myń badanasyn satyp alyp, Qazaqstanǵa jetkizgen. Gúlder Almatydaǵy Ortalyq mádenıet jáne demalys saıabaǵynda jáne Almaty qalasyndaǵy Tuńǵysh Prezıdent parkinde ósip tur. Onyń aıtýynsha, golandyq seleksıonerler, sondaı-aq «Qazaqstan Respýblıkasy» surpyn da jasaǵan. Atalǵan qyzǵaldaqtyń gúlderi bokal tárizdi jáne asa iri bolyp keledi.
Aldaǵy ýaqytta qyzǵaldaq gúliniń sanyn edáýir arttyrý kózdelgen. «Qazaqstan – qyzǵaldaqtyń otany bolyp sanalatynyn ǵalymdar ǵylymı eńbekte de dáleldegen jáne Elbasy óziniń «Uly dalanyń jeti qyry» maqalasynda da erekshe atap ótti. Qazaqstan jerinen alǵash ret dala qyzǵaldaqtary XVIII ǵasyrda túrik padıshahtary arqyly Túrkıaǵa, odan ári Avstrıa men Golandıaǵa taratyldy. Qazirgi kezde Golandıa eli qyzǵaldaqtyń túrli sorttaryn shyǵarýda. Elbasy N.Nazarbaevtyń maqalasy shyqqannan keıin Golandıada 3 túrli sortty qyzǵaldaqtyń túri daıyndaldy.