8 qańtarda Petropavl – Astana tas jolynda aýyr jol-kólik oqıǵasy tirkeldi, dep habarlaıdy Aqshamnews.kz tilshisi.
Polısıanyń málimetinshe, Toyota Camry jeńil kóligi men Shacman markaly júk kóligi soqtyǵysqan. Apat saldarynan Toyota kóligindegi tórt adam – júrgizýshi jáne úsh jolaýshy oqıǵa ornynda qaza boldy.
Soltústik Qazaqstan oblysy polısıa departamenti oqıǵaǵa baılanysty qylmystyq is qozǵalyp, sotqa deıingi tergeý bastalǵanyn habarlady.
Aldyn ala málimet boıynsha, Toyota kóligin 25 jastaǵy jigit basqarǵan jáne ol Astanaǵa baǵyt alǵan. Jolaýshylar arasynda 63 jastaǵy áıel jáne 14 pen 17 jastaǵy eki jasóspirim bolǵan. Marqum áıel nemereleriniń dúnıege kelgenin estip, olardy kórý úshin jolǵa shyqqany aıtyldy.
Tártip saqshylary apat bolǵan ýchaskede qar men muzdyń bolmaǵanyn atap ótti. Bastapqy boljamǵa sáıkes, jeńil kólik qarsy baǵytqa shyǵyp ketip, sonyń saldarynan eki kólik joldan shyǵyp, soqtyǵysqan.
Qazir oqıǵanyń barlyq mán-jaıyn anyqtaý jumystary júrgizilip jatyr.