Konstıtutsıyalyq komıssıyanyń úshínshí otyrysynda Adam qūqyqtary jóníndegí uákíl Artur Lastaev adam men azamattyń negízgí qūqyqtary men bostandyqtaryn qorǵaudy kúsheıtuge qatysty ūsynystar jónínde sóz sóıledí.
Ol ómír súru qūqyǵyn absolyuttí qūqyq retínde bekítu jóníndegí bastamalardy qoldau qazírgí qazaqstandyq memlekettíń mańyzdy qūndylyqtaryn kórsetetínín atap óttí.
«Bíz múmkíndígínshe ómír súru qūqyǵyn absolyuttí etuge ótínísh bíldírdík. Būǵan kóptegen bedeldí sarapshylar, sonyń íshínde halyqaralyq deńgeıdegíler de: “Jaraısyńdar!” dep aıtady», – dedí Lastaev.
Onyń aıtuynsha, būl qūqyqtyń absolyuttí sıpatyn Konstıtutsıyada bekítu ólím jazasynan bas tartudy ǵana emes, sondaı-aq kez kelgen jaǵdaıda – apat kezínde, auru halde nemese shabuyl jasalǵanda – azamattardyń ómírín míndettí túrde qorǵaudy bíldíredí.
Lastaev sondaı-aq ádíl sotqa kepíldíkterdí adamnyń negízgí qūqyqtary men bostandyqtary bólímíne kóshíru turaly ūsynystar Qazaqstannyń ūlttyq qūndylyqtary men tarıhı tájírıbesíne saı keletínín atap óttí. Ol ádíl sot tórelígíníń qaǵıdattary bıler soty dáuírínen berí qalyptasyp, azamattardyń ar-namysy men qadír-qasıetín, jeke bostandyǵyn jáne jeke ómíríne qol sūǵylmaushylyqty dástúrlí túrde qorǵap kelgenín eske saldy.
«Būl qaǵıdattardy negízgí adam qūqyqtarynyń qataryna engíze otyryp, bíz Konstıtutsıyada ūlttyq qūndylyqtarymyzdy árí tarıhı tájírıbemízdí beıneleımíz», – dedí ombudsmen.
Sonymen qatar, Lastaev Konstıtutsıyanyń jetínshí bólímíníń atauyn ózgertu bastamasyn qoldap, būl ózgeríster adam qūqyqtaryn qorǵauǵa basymdyq berudí kúsheıtetínín atap óttí. Ol jańartylǵan Konstıtutsıya redaktsıyasynda osy normalardy bekítu Qazaqstan úshín adam, onyń qūqyqtary men bostandyqtary – eń joǵary qūndylyq ekenín rastaıtynyna sením bíldírdí.