Konstıtýsıalyq komısıanyń úshinshi otyrysynda Adam quqyqtary jónindegi ýákil Artýr Lastaev adam men azamattyń negizgi quqyqtary men bostandyqtaryn qorǵaýdy kúsheıtýge qatysty usynystar jóninde sóz sóıledi.
Ol ómir súrý quqyǵyn absolútti quqyq retinde bekitý jónindegi bastamalardy qoldaý qazirgi qazaqstandyq memlekettiń mańyzdy qundylyqtaryn kórsetetinin atap ótti.
«Biz múmkindiginshe ómir súrý quqyǵyn absolútti etýge ótinish bildirdik. Buǵan kóptegen bedeldi sarapshylar, sonyń ishinde halyqaralyq deńgeıdegiler de: “Jaraısyńdar!” dep aıtady», – dedi Lastaev.
Onyń aıtýynsha, bul quqyqtyń absolútti sıpatyn Konstıtýsıada bekitý ólim jazasynan bas tartýdy ǵana emes, sondaı-aq kez kelgen jaǵdaıda – apat kezinde, aýrý halde nemese shabýyl jasalǵanda – azamattardyń ómirin mindetti túrde qorǵaýdy bildiredi.
Lastaev sondaı-aq ádil sotqa kepildikterdi adamnyń negizgi quqyqtary men bostandyqtary bólimine kóshirý týraly usynystar Qazaqstannyń ulttyq qundylyqtary men tarıhı tájirıbesine saı keletinin atap ótti. Ol ádil sot tóreliginiń qaǵıdattary bıler soty dáýirinen beri qalyptasyp, azamattardyń ar-namysy men qadir-qasıetin, jeke bostandyǵyn jáne jeke ómirine qol suǵylmaýshylyqty dástúrli túrde qorǵap kelgenin eske saldy.
«Bul qaǵıdattardy negizgi adam quqyqtarynyń qataryna engize otyryp, biz Konstıtýsıada ulttyq qundylyqtarymyzdy ári tarıhı tájirıbemizdi beıneleımiz», – dedi ombýdsmen.
Sonymen qatar, Lastaev Konstıtýsıanyń jetinshi bóliminiń ataýyn ózgertý bastamasyn qoldap, bul ózgerister adam quqyqtaryn qorǵaýǵa basymdyq berýdi kúsheıtetinin atap ótti. Ol jańartylǵan Konstıtýsıa redaksıasynda osy normalardy bekitý Qazaqstan úshin adam, onyń quqyqtary men bostandyqtary – eń joǵary qundylyq ekenin rastaıtynyna senim bildirdi.