Prezıdent senímdí ınfraqūrylymdy tsıfrlyq ekonomıkanyń taǵy bír berík tūǵyry retínde atady, – dep habarlaıdy aqshamnews.kz tílshísí.
Būl – tehnologıyalyq derbestíktíń alǵysharty. Onyń mańyzy energetıka nemese logıstıka salasynan kem túspeıdí.
– Esepteu quatyn, derekterdí jáne baılanys arnalaryn baqylauda ūstau aıryqsha ózektí. Qazírgí zamanda mūny ózgelerden táuelsíz boludyń būljymas qaǵıdasy desek, artyq aıtqandyq emes. Bízge jasandy ıntellekt pen «būltty» tehnologıya qyzmetteríne arnalǵan ınfraqūrylymdyq bazany damytu kerek. Osy baǵyttaǵy basty joba – «Derekterdí óńdeu ortalyqtarynyń alqabyn» qūru ísín júıelí júrgízu qajet. Būl – aldaǵy uaqytta ekonomıkamyzdyń jańa ındustrıyalyq tíregíne aınalatyn auqymdy klaster. Mūndaı ortalyqtar kásípkerler men ǵalymdardy esepteu resurstarymen qamtamasyz etedí. Senímdí tsıfrlyq ınfraqūrylym elímízdíń strategıyalyq aktıvíne aınaluǵa tıís. Úkímet «Derekterdí óńdeu ortalyqtarynyń alqaby» jobasyn mūqıyat pysyqtauy qajet. Būl rette halyqaralyq standarttar jáne osy saladaǵy jetekshí kompanıyalar bekítken talaptar eskeríluge tıís. Eń bastysy, būl asa mańyzdy jospar elímízdíń sūranysyna saı jáne zamanauı ozyq úrdísterdí eskere otyryp jasalǵany jón. Data-ortalyqtar – sándí tsıfrlyq tehnologıyalar kórmesí emes, – dedí Memleket basshysy.
Qasym-Jomart Toqaev kıberqauípsízdík jítí qadaǵalanbasa, kez kelgen ınfraqūrylym syr beretínín málímdedí.
– Ūlttyq tehnologıyalyq ónímníń báríne qauípsízdík standarttaryn engízu kerek. Derbes derekterdí qorǵau míndetí Konstıtutsıyada naqty bekítíldí. Sondyqtan būl jūmys qūpıyalyq, tūtastyq, qoljetímdílík qaǵıdattaryna negízdeluí qajet. Memlekettík tsıfrlyq qyzmetterdíń tūraqty árí qauípsíz jūmys ísteuí – basty talaptyń bírí. Ashyqtyq, jahandyq ıntegratsıya jáne ūlttyq múdde arasyndaǵy teńgerímdí saqtau – aıryqsha mańyzdy. Memleket osy jūmysty tıímdí ūıymdastyrǵany dūrys. Tsıfrlyq qauípsízdík máselesí vırtualdy keńístík auqymynan áldeqashan shyǵyp kettí. Tayau Shyǵystaǵy oqıǵalar jahandyq tártíptíń osal tūstaryn aıqyndap berdí. Ókíníshke qaraı, búgínde damyǵan elderdíń tsıfrlyq ınfraqūrylymyna qater tóníp tūrǵany jasyryn emes. Mūndaı jaǵdaıda halyqaralyq bızneske qauípsízdík auadaı qajet. Jahandyq tehnologıyalyq qauymdastyq úshín ınstıtuttar men qūqyqtyq júıeníń tūraqty, al tsıfrlyq ınfraqūrylymnyń sapaly bolǵany óte mańyzdy. Qazaqstandy «tsıfrlyq habqa» aınaldyru jónínde míndet qoıdyq. Demek osy talaptyń údesínen shyǵa bílu qajet, – dedí Prezıdent.