Almaty mektepterínde 357 myńnan astam oqushy oqu jylyn ayaqtady, – dep habarlaıdy aqshamnews.kz tílshísí.
Almatyda 2025–2026 oqu jyly resmı túrde qorytyndylandy. Qaladaǵy 360 mektepte bílím alǵan 357 222 oqushy úshín jazǵy demalys bastaldy. Būl turaly Almaty qalasy Bílím basqarmasynyń ókílderí habarlady.
Oqu jyly «Adal azamat» baǵdarlamasy ayasynda ótken «Bílímím – Otanyma» atty bíryńǵaı synyp saǵatymen túıíndeldí. Al mektep túlekterí úshín «Mektebím, saǵan myń alǵys!» atty saltanatty jıyn ūıymdastyryldy.
Bıyl qala mektepterín 51 391 oqushy támamdady. Onyń íshínde 30 411 oqushy 9-synypty bítírse, olardyń shamamen 11 myńy kolledjderde bílímín jalǵastyrudy josparlap otyr.
11-synypty ayaqtaǵan 20 980 túlekke jalpy orta bílím turaly attestat tabystalady. Onyń 17 493-í memlekettík mektepterdíń, al 3 487-sí jekemenshík bílím beru ūıymdarynyń oqushylary. Sonymen qatar, 799 túlek «Altyn belgíge» úmítker atanyp otyr.
Qorytyndy attestattau emtıhandary 29 mamyr men 15 mausym aralyǵynda ótedí. Attestattardy saltanatty tabystau rásímí 18 mausymǵa josparlanǵan.
Almaty qalasy Bílím basqarmasynyń basshysy Sáken Aralbaev mektep bítíru ís-sharalarynda qauípsízdík talaptary basty nazarda bolatynyn aıtty.
«Bíz túlekter būl kúndí tek jaǵymdy estelíktermen este saqtauy úshín barlyq jaǵdaı jasaımyz. Sondyqtan zańsyz aqsha jınauǵa jol berílmeıdí. Anımatorlar, avtokortejder men artyq saltanatty sharalar ūıymdastyrylmaıdy. Mektep eń aldymen balalar úshín jūmys ísteuí kerek. Barlyq ís-shara mektep aumaǵynda, kúsheıtílgen baqylaumen jáne qauípsízdík talaptaryn saqtaı otyryp ótkízíledí», – dedí Sáken Aralbaev.
Basqarma ókílderíníń málímetínshe, bıylǵy oqu jyly almatylyq oqushylar úshín jetístíkterge toly boldy. 160 myńnan astam oqushy ǵylymı jáne shyǵarmashylyq baıqaularǵa qatysyp, 2,7 myńnan asa júldege ıe bolǵan.
Sonymen qatar Almaty qūramasy 24 jyl qatarynan jaratylystanu-matematıkalyq baǵyttaǵy respublıkanyń úzdík olımpıadalyq komandasy atandy.
Halyqaralyq deńgeıdegí bílím dodalarynda da almatylyq oqushylar joǵary nátıje kórsettí. Olar Lıtvada ótken European Mathematical Olympiad, Tunıstegí I-FEST² jáne AQSh-taǵy FIRST Championship sekíldí bedeldí jarystarda jalpy sany 99 medal jeńíp aldy.
Qalada bílím beru ınfraqūrylymyn damytu jūmystary da jalǵasuda. 2025–2026 oqu jylynda 37 bílím beru nysany paıdalanuǵa berílíp, nátıjesínde 40 myńǵa juyq jańa oryn ashyldy.
«Keleshek mektebí» ūlttyq jobasy ayasynda jalpy syıymdylyǵy 34 200 oryndyq 20 jańa mektep íske qosyldy. Būdan bólek, qosymsha oqu korpustary men memlekettík balabaqshalar salyndy.
«Bízdíń maqsat — tek ekínshí auysymdy qysqartu emes, bílím beru sapasyn jańa deńgeıge kóteru. STEM-zerthanalary, robototehnıka jáne jasandy ıntellekt kabınetterímen jabdyqtalǵan zamanauı mektepter, jańartylǵan telekommunıkatsıya kolledjí, “Samǵau” men “Shabyt” shyǵarmashylyq ortalyqtary — qazírgí qoǵam sūranysyna berílgen naqty jauap. Sonymen qatar jetím balalarǵa arnalǵan “Janūya” keshení tolyqtaı jańǵyrtyldy», – dedí Sáken Aralbaev.
Sondaı-aq, basqarma ókílderí jazǵy demalys kezínde oqushylarǵa arnalǵan «Balalar kítaphanasy» jobasy ayasynda kítap oqu men fılm kóruge qatysty ūsynymdar ázírlengenín habarlady. Būdan bólek, ata-analarmen balalardyń qauípsízdígíne qatysty qosymsha túsíndíru kezdesulerí ūıymdastyrylady.