Almatyda shaǵyn jáne orta bıznestí memlekettík qoldau sharalaryn júzege asyru jalǵasuda, – dep habarlaıdy aqshamnews.kz tílshísí.
Almaty qalasynyń Kásípkerlík jáne ınvestıtsıyalar basqarmasy «Damu» kásípkerlíktí damytu qory» AQ-pen bírlesíp, shaǵyn jáne orta kásípkerlíktí damytuǵa, qarjylandyrudyń qoljetímdílígín arttyruǵa jáne ískerlík belsendílíktí yntalandyruǵa baǵyttalǵan keshendí qoldau sharalaryn íske asyruda.
Qazírgí uaqytta kásípkerlík subektílerí úshín kelesí qoldau baǵdarlamalary qoljetímdí:
1. «Jana Business» — jańadan bastaǵan jáne jūmys ístep tūrǵan kásípkerlerdí qoldauǵa arnalǵan baǵdarlama. Baǵdarlama ayasynda bıznes-jobalar jeńíldetílgen sharttarmen qarjylandyrylady. Qarjylandyrudyń eń joǵary somasy — 500 mln teńgege deıín, syıaqy mólsherlemesí — jyldyq 12,6%;
2. «Órleu 2026» — kásípkerlíktí damytuǵa jáne shaǵyn jáne orta bıznes subektíleríne qarjylandyru qoljetímdílígín qamtamasyz etuge baǵyttalǵan baǵdarlama. Nesıeníń eń joǵary somasy — 7 mlrd teńgege deıín, syıaqy mólsherlemesí — jyldyq 12,6%;
3. «Ísker Aımaq» — óńírlík kásípkerlíktí qoldau tetígí. Baǵdarlama ayasynda basym jobalar qarjylandyrylady. Nesıe kólemí — 200 mln teńgege deıín, syıaqy mólsherlemesí — jyldyq 12,6%, subsıdıyalau merzímí — 3 jylǵa deıín;
4. «Damu» kásípkerlíktí damytu qory» AQ arqyly kepíldík beru qūraldary — ekínshí deńgeılí bankterden nesıe rásímdeu kezínde kásípkerlerge jetíspeıtín kepílzat máselesín sheshuge múmkíndík beredí.
Baǵdarlamalar ayasynda qūny 7 mlrd teńgege deıíngí jáne 7 mlrd teńgeden asatyn jobalarǵa kepíldík beru tetíkterí qarastyrylǵan.
Sonymen qatar Almatyda kásípkerlerdí áleumettík kásípkerlík subektíleríníń tízímíne engízu jūmystary jalǵasuda.
Áleumettík kásípkerlík tízímíne engízílgen kásípkerler áleumettík bastamalardy júzege asyru jáne bıznestí damytu úshín 5 mln teńgege deıíngí memlekettík granttardy qosa alǵanda, qosymsha memlekettík qoldau sharalaryna úmítker bola alady.
Tízímge halyqtyń áleumettík osal toptaryn qoldauǵa, áleumettík máselelerdí sheshuge jáne azamattardyń ómír súru sapasyn arttyruǵa baǵyttalǵan qyzmetpen aınalysatyn shaǵyn jáne orta bıznes subektílerí ótíním bere alady.
Atalǵan sharalar Almatyda qolaıly kásípkerlík ortany qalyptastyruǵa, tūraqty bıznestí damytuǵa jáne áleumettík baǵyttaǵy jobalardy qoldauǵa baǵyttalǵan.