Almaty qalasynda jastar shyǵarmashylyǵyn qoldauǵa baǵyttalǵan JAS GALA festıvalí óz máresíne jettí, – dep habarlaıdy aqshamnews.kz tílshísí.
Almaty qalasy Jastar sayasaty basqarmasynyń qoldauymen jáne «Almaty studentter Alyansy» korporatıvtík qorynyń ūıymdastyruymen ótken baıqau bıyl qala jastary úshín írí shyǵarmashylyq alańdardyń bíríne aınaldy.
2026 jylǵy 23 mamyrda teńíz deńgeıínen 1000 metr bıíktíkte ornalasqan halyqaralyq «Sunkar» shańǵy tramplınderí keshenínde festıvaldíń fınaly men saltanatty marapattau rásímí óttí.
JAS GALA shyǵarmashylyq baıqauy 2026 jylǵy 31 nauryzda bastalyp, talantty jastardyń kásíbı damuyna, shyǵarmashylyq áleuetín arttyruǵa jáne mádenı-ruhanı qūndylyqtardy nasıhattauǵa baǵyttaldy. Festıval vokal, horeografıya, teatr, aspaptyq oryndau jáne mobılografıya baǵyttary boıynsha óttí. Baıqau joǵary oqu oryndary íshíndegí jáne qalalyq kezeńderdí qamtydy. Jalpy jobaǵa Almaty qalasyndaǵy 26 joǵary oqu ornynyń ókílderí qatysty.
«Búgíngí jastar – eldíń bolashaǵy ǵana emes, qazírgí qoǵamnyń qozǵaushy kúshí. Sízderdíń ónerge, shyǵarmashylyqqa jáne jańa ıdeyalarǵa degen ūmtylystaryńyz Almaty jastarynyń deńgeıín jańa beleske kóterude. Mūndaı alańdar talantty jastardy bíríktíríp, óz qabíletterín ashuǵa múmkíndík beredí. Bastapqyda shaǵyn joba bolǵan bastama búgínde shamamen 5000 studenttí bíríktírgen auqymdy festıvalge aınaldy. Barsha qatysushylarǵa tabys, shabyt jáne jańa jetístíkter tíleımín. Laıyqty marapattaryńyzben qūttyqtaımyn!», – dedí Almaty qalasy Jastar sayasaty basqarmasynyń basshysy Azız Kajdenbek.
Baıqaudyń barlyq kezeńínde qatysushylardy Qazaqstannyń tanymal mádenıet jáne óner qaıratkerlerí baǵalady. Olardyń qatarynda Aıjan Nūrmaǵambetova, Bolat Ábílmanov, Aset Imanǵalı, Baıǵalı Esenálıev jáne basqa da sarapshylar bar. Festıvaldíń jalpy júlde qory 7 500 000 teńgení qūrady. Jeńímpazdarǵa aqshalaı syılyqtar, al arnaıy nomınatsıya ıeleríne baǵaly syılyqtar tabystaldy.
Baıqau qorytyndysy boıynsha:
— «Vokal» nomınatsıyasy boıynsha Gran-prı ıegerí Narxoz University studentí Marhaen Manus boldy;
— «Horeografıya» nomınatsıyasynda Qazaq ūlttyq qyzdar pedagogıkalyq unıversıtetíníń «Primerose» ūjymy úzdík dep tanyldy;
— «Teatr» baǵyty boıynsha Ál-Farabı atyndaǵy QazŪU-dyń «BÍZ» studenttík teatry jeńíske jettí;
— «Mobılografıya» nomınatsıyasynda Qazaq ūlttyq qyzdar pedagogıkalyq unıversıtetíníń studentí Ómírzaq Ǵaını bírínshí oryndy ıelendí.
«Festıval barysynda jastardyń shyǵarmashylyq ízdenísterí, sahnalyq mádenıetíníń joǵary deńgeıí jáne ónerge degen shynaıy qyzyǵushylyǵy aıqyn kóríndí. JAS GALA-nyń tek baıqau ǵana emes, talantty jastardy bíríktíretín írí mádenı platformaǵa aınalyp kele jatqanyna quanyshtymyz», – dep atap óttí ūıymdastyrushylar.