Senat tóraǵasy Máýlen Áshimbaev Prezıdenttiń saıası reformalaryn "sıngýlár núkte" dep atap, bir palataly Parlament qurý bastamasynyń tarıhı mańyzyn túsindirdi. Onyń aıtýynsha, bul usynys - ortalyqsyzdandyrý úderisin jedeldetip, ókildi bılikti kúsheıtýdiń jáne ádiletti saıası júıe qalyptastyrýdyń qısyndy jalǵasy.
Qazaqstan Parlamentine 30 jyl tolýyna oraı Senat tóraǵasy Máýlen Áshimbaev kólemdi taldamalyq maqala jarıalady. Onda ol Memleket basshysy Qasym-Jomart Toqaevtyń eldi jańǵyrtý saıasaty men jańa formattaǵy Parlament qurý bastamasyn egjeı-tegjeıli taldady.
Máýlen Áshimbaev Prezıdent usynǵan bir palataly Parlament tujyrymdamasyn "Ádiletti Qazaqstan" qurý jolyndaǵy jańa kezeń dep atady. Onyń pikirinshe, bul qadam ókildi ınstıtýttardy kúsheıtip, bıliktiń jeke tulǵalardyń qolynda shoǵyrlaný qaýpin azaıtady jáne saıası plúralızm keńistigin keńeıtedi.
"Prezıdenttiń bastamasy shamadan tys ortalyqtanǵan basqarý júıesin birtindep joıyp, qoǵam múddesi eskeriletin teńgerimdi básekeli júıe qurýdy kózdeıdi", – dedi Senat tóraǵasy.
Maqalada ol bir palataly Parlament tek tehnıkalyq ózgeris emes, "Kúshti Prezıdent – yqpaldy Parlament – esep beretin Úkimet" qaǵıdatyna negizdelgen reformalardyń jalǵasy ekenin atap ótti.
Áshimbaev sondaı-aq Parlamenttiń 30 jyl ishindegi rólin, Senattyń el turaqtylyǵyn qamtamasyz etýdegi mısıasyn jáne sıfrlyq demokratıa dáýirinde ókildi bıliktiń jańa formatta jumys isteý qajettigin erekshe atap ótti.
"Elektrondyq úkimetten elektrondyq Parlamentke deıin bir-aq qadam. Jasandy ıntellekt pen sıfrlyq tehnologıalar zań shyǵarý prosesiniń ashyqtyǵyn jáne tıimdiligin arttyrady", – dedi ol.
Senat tóraǵasynyń aıtýynsha, reformanyń túpki maqsaty – yqpaldy, kóp partıaly, joǵary tehnologıalyq jáne halyq únine qulaq asatyn jańa Parlament qurý.
Máýlen Áshimbaevtyń maqalasy - prezıdenttik reformalardyń ıdeologıalyq ári ınstıtýsıonaldyq túsindirmesi, onda ol Qazaqstan parlamentarızminiń evolúsıasyn, Senattyń tarıhı rólin jáne bolashaq sıfrlyq Parlament modelin tutas qarastyrady.