Men úshín pedagog mamandyǵynyń qadírí erekshe. Ūstazdyń eńbegí kózge bírden túse bermeıdí.
Onyń nátıjesí bírneshe jyldan keıín, keıde odan da ūzaq uaqyttan soń kórínuí múmkín. Bíraq dál osy ūzaq merzímdí nátıje būl mamandyqtyń qoǵam úshín mańyzyn aıqyndaıdy. Osy oraıda, elímízdíń Prezıdentí Q.Toqaevtyń: «Táuelsízdígímízdí nyǵaıtyp, elímízdí odan ary órkendetu - qazírgí ūrpaqtyń qasıettí boryshy. Sondyqtan bíz sízderge zor úmít artamyz» degen sózí oıǵa oralady.
Osy bír jalyndy sózderdíń astarynda Otan aldyndaǵy borysh, amanatqa qıyanat jasamau, jauapkershílík júgí jatyr. Men de ózíme júktelgen amanatqa qıyanat jasamaı, bolashaqtyń ūrpaqtaryn tárbıeleu jolynda kúsh salyp júrmín. Osy oraıda «Ūstazy jaqsynyń ūstamy jaqsy» deıtín halyq danalyǵy qaı elge, qaı ūltqa bolmasyn aqıqattyǵyn taǵy bír dálelí bolsa kerek.
Búgín mektepte bílím alyp júrgen ár bala kúní erteń belgílí bír salada sheshím qabyldaıtyn, eńbek etetín, qoǵamnyń damuyna úles qosatyn azamat. Bíz onyń bolashaǵyn aldyn ala belgíleı almaımyz. Bíraq sol bolashaqqa qajettí bílím men daǵdyny qalyptastyruǵa múmkíndík bere alamyz.
Sondyqtan mūǵalím úshín eń basty míndet- balany tek búgíngí talapqa daıyndau emes, ózgeríp otyratyn qoǵamda óz ornyn taba alatyn deńgeıge jetkízu. Men pedagog retínde óz jūmysymnyń mánín osydan kóremín. Mekteptíń búgíngí nátıjesí mańyzdy, bíraq onyń eń úlken nátıjesí mektepten shyqqan shákírttíń erteńgí ómírínde kórínedí. Jalpy, HHÍ ǵasyr tehnologıyalar men básekelestíktíń damyǵan zamany. Qazír mūǵalím tek óz pánímen shektelíp qalmaı, oqushylardyń da jan-jaqty bílím aluyna áser etuí tıís. Demek, búgíngí mūǵalímníń boıynda jan-jaqtylyq, ízdenímpazdyq pen qyzyǵushylyq, bílímge qūlshynys, psıhologıyalyq bílím sekíldí qarym-qabílet túgel jınaqtaluy kerek. Eń bastysy - ózíńníń júregíń qalaǵan, óz ísíńdí súyu. Átteń-aıy, qazír kóp jastar ózderí qalamaǵan mamandyqqa túsíp jatady. Osylaısha, aldymen ózíńe, ekínshí mamandyqqa qıyanat jasaıdy. Sondyqtan ózíńníń qalaǵan ísíńmen aınalyssań ǵana júregíń jaı tauyp, shyn peıílmen jūmys ísteı alasyń der edím. Osy jaǵynan alǵanda óz basym qalaǵan mamandyǵymdy adaspaı taptym deuge bolady.
Ár sabaqta oqushyny jalyqtyryp almaıtyndaı túrlí onlaın ūıymdastyryp, ózara qarym-qatynas ornatuda psıhologıyany da meńgeríp jatyrmyn. Óıtkení aldymdaǵy árbír oqushy - Qazaqstannyń bolashaǵy. Elímízdíń bolashaǵymyz jarqyn boluy úshín jastarymyz bílímdí, qūzyrettí árí jan-jaqty boluy tıís. Oqushyǵa tek pán boıynsha sabaq beríp qana qoımaı, bolashaǵyna qajettí tárbıe, aqyl-keńesímdí bermekpín. Meníń bar armanym oqushyny jaqsy íske qanattandyra alatyndaı ūstaz atanu. Al, ūstazdyń jetístígí shákírtíníń baǵyndyrǵanyn belesín kóru. Sírá, «Ūstazdyq etken jalyqpas, úıretuden balaǵa» degen osy bolar.
Ámına Tortaeva, Sh.Uálıhanov atyndaǵy №12 gımnazıyanyń tarıh pání mūǵalímí