Alatau audanynda áleumettík ınfraqūrylymdy damytu jūmysy jalǵasyp jatyr, dep habarlaıdy aqshamnews.kz tílshísí.
Bıyl mūnda jańa mektep pen balalarǵa arnalǵan qosymsha bílím beru ortalyǵy ashylyp, alǵashqy medıtsınalyq-sanıtarıyalyq kómek kórsetu nysany salynyp bíttí. Sonymen qatar densaulyq saqtau salasynda jańa jobalar qarastyrylǵan. Audannyń atqarǵan jūmysy turaly Almaty qalasynyń Óńírlík kommunıkatsıyalar qyzmetínde ótken baspasóz máslıhatynda Alatau audanynyń ákímí Danıyar Qyryqbaev málímdedí.
Jańa oqu jylyna oraı audanda «Keleshek mektepterí» ūlttyq jobasy ayasynda jalpy syıymdylyǵy 3 200 oryn bolatyn ekí jańa mektep ashyldy. Aqmarjan shaǵyn audanynda 2 000 oryndyq, Ǵajaıyp shaǵyn audanynda 1 200 oryndyq mektep paıdalanuǵa beríldí. Sonymen qatar Zerdelí shaǵyna udanynda 550 oryndyq mektep qoldanysqa berílíp, Qarasu shaǵyn audanyndaǵy №160 mektep renovatsıyadan keıín qaıta jūmysyn bastady.
«Bílím beru ınfraqūrylymyn damytu audan úshín basym baǵyttyń bírí bolyp qala beredí. Jūmys tek jańa nysandar salumen ǵana shektelmeı, qoldanystaǵy mektepterdí jańartudy da qamtıdy. Būl audannyń ártúrlí shaǵyn audandarynda bílím beru júıesíníń múmkíndígín bír mezette keńeıtuge múmkíndík beredí», – deıdí audan ákímí Danıyar Qyryqbaev.
Balalardyń mektepten tys uaqytta íspen aınalysuyna da qosymsha múmkíndík jasaldy. Sayaly shaǵyn audanynda ekínshí Innovatsıyalyq shyǵarmashylyq ortalyǵy ashyldy. Mūnda ekí basseın, boks zaly, shyǵarmashylyq jáne sport sabaǵyna arnalǵan keńístík qarastyrylǵan.
Taǵy bír baǵyt – medıtsınalyq ınfraqūrylymdy damytu. Sayalyda alǵashqy medıtsınalyq-sanıtarıyalyq kómek kórsetu ortalyǵy salynyp bíttí. Ony qazan aıynda ashpaqshy. Daraboz shaǵyn audanynda 300 oryndyq kópbeıíndí eresekter auruhanasy men 200 oryndyq perınataldyq ortalyq salynady.
Auysymyna 400 adam qabyldauǵa arnalǵan taǵy bír emhana salu úshín audany 1,3 gektar jer uchaskesí belgílendí.
«Densaulyq saqtau salasyn damytu alǵashqy medıtsınalyq kómek kórsetetín nysandardan bastap írí statsıonarlarǵa deıíngí ártúrlí deńgeıdegí nysandardy qamtıdy. Būl jūmystyń bír bólígí ayaqtalǵan nysandar qatarynda bolsa, basqa jobalar aldaǵy kezeńge josparlanǵan», – dedí ákím.
Tūrǵyndarǵa áleumettík qoldau kórsetu jūmysy da jalǵasty. Alatau audanynda halyqtyń ártúrlí sanatyna arnalǵan bes joba júzege asyp jatyr: «Baqytty otbasy», «Belsendí ūzaq ómír ortalyǵy», «Teń Qoǵam», «Dástúrlí qolónerdí damytu» men «Shyńǵa órleu». Būl jobalardyń jalpy byudjetí 203,6 mln teńgení qūraıdy.
Jyl basynan berí 421 otbasynan 2 myńnan astam adam atauly áleumettík kómek aldy. Būl maqsattarǵa 278 mln teńge baǵyttaldy. Bírjolǵy áleumettík kómek 3 053 tūrǵynǵa kórsetílíp, oǵan jalpy 280 mln teńge jūmsaldy.
6 590 alushy ońaltu qyzmetterímen jáne tehnıkalyq qūraldarmen qamtamasyz etíldí. 96 otbasyna jalpy somasy 4 mln teńge bolatyn tūrǵyn úı kómegí kórsetíldí. Sondaı-aq 185 anaǵa «Altyn alqa» men «Kúmís alqa» memlekettík marapaty tabystaldy.
«Audandaǵy áleumettík jūmys bírneshe baǵytty qamtıdy jáne tūrǵyndardyń ártúrlí sanatyna arnalǵan. Qoldanystaǵy kómek túrímen qatar, otbasylarǵa, zeınetkerlerge, erekshe qajettílígí bar adamdar men áleumettík osal otbasylardan shyqqan balalarǵa arnalǵan jeke jobalar jūmys ísteıdí», – dep tolyqtyrdy sózín Danıyar Qyryqbaev.
Osylaısha, Alatau audanynda áleumettík ınfraqūrylymnyń bírneshe baǵyty – bílím beru, densaulyq saqtau, balalarǵa qosymsha bílím beru men halyqty áleumettík qoldau jaǵy qatar qatar damyp kele jatyr.