Májilis depýtaty Anas Baqqojaev bıylǵy jumys boıynsha úkimettiń jumysyn qalaı baǵalaıtynyn aıtty, - dep habarlaıdy aqshamnews.kz tilshisi.
Bul suraqty oǵan Májilis kýlýarynda jýrnalıser qoıǵan. Depýtat mınıstrler kabınetiniń jumysyna "3+" degen baǵa beretinin aıtty. Onyń aıtýynsha, prezıdenttiń búdjet shyǵyndaryn ońtaılandyrý jónindegi tapsyrmasy tolyq oryndalmaǵan.
"Plús úsh. Qarajat ońtaılandyrylmaǵan. Premer-mınıstr on kún ishinde búdjet shyǵyndaryn ońtaılandyrý boıynsha sharalar qabyldaımyn dedi. Endi qaraıyq, ońtaılandyryldy ma?! Joq, áli joq. Bul máseleni ótken joly da kótergenmin. Bir ǵana "pampers" máselesin alaıyq. Búkil Qazaqstan boıynsha "pampers" jetkizetin bir ǵana tasymaldaýshy bar. Múmkindigi shekteýli azamattar maǵan renjimesin, men tek mysal retinde aıtyp otyrmyn. Bir ǵana "pamperske" segiz mıllıard teńge ketedi, baǵa qoldan kóterilgen joq pa, artyq shyǵyndar qarastyrylmaǵan ba?! Bul - tek bir mysal. Qalǵan mınıstrlikterdiń bárin tekserse, qyrýar qarjyny únemdeýge bolar edi. Sondyqtan bul baǵyttaǵy jumys sál aqsap tur", - dedi ol.