Marqum Aqnár Gúlstannyń anasy ádildikke qol jetkize almaı júrgenin aıtyp, prezıdent Toqaevqa úndeý joldady.
“Qyzymnyń qaıtys bolǵanyna búgin tup-týra bes júz kún boldy. Osy bes júz kúnnen beri qaraı áli ádildikke qol jetkize almaı kele jatyrmyn. İs áli sheshilgen joq. Úzdiksiz shaǵymdanýymnyń nátıjesinde is Ulttyq qaýipsizdik komıtetiniń tergeýine berildi. Áli de tolyqqandy sheshim shyqqan joq. Kúdiktiler ustalǵan joq. Meniń jalǵyz qyzymdy óltirgender jazalanbaı jatyr. Bul isti jabýǵa bolmaıdy. Bizdiń Qazaqstan Respýblıkasynda zań bar. Aqordada aıtylǵan ár tapsyrma oryndalýǵa tıis. Memleket basshysy aralasyp, ádil sheshim shyǵarýǵa kómektesedi dep áli de úmittenemin”, - dedi ol.
Sondaı-aq, Aqnárdiń anasy Ulttyq qaýipsizdik komıtetiniń basshysy Ermek Saǵymbaev, bas prokýror Berik Asylovqa da úndeý jasady.
Aqnárdiń qazasy týraly ne belgili?
2024 jylǵy shildede almatylyq Aqnár Gúlstan kópqabatty úıdiń terezesinen qulap, aýyr jaraqattan qaza tapty. Marqumnyń týystary onyń ózine qol jumsaǵanyna senbeıdi jáne ony tanystary óltirgenin aıtty.
Marqumnyń anasy Gúlstan Qamıttiń aıtýynsha, qyzy qular aldynda azaptalǵan. Saraptama nátıjesi boıynsha Aqnárdiń denesinde jaraqat izderi bolǵan, tistelgen jáne tyrnalǵan jaralar baıqalǵan. Páterden synǵan tyrnaqtar men julynǵan shashtar tabylǵan. Áıeldiń sózinshe, qyzyn eki kýrstasy azaptap, keıin terezeden laqtyryp jibergen.
Qaıtys bolǵan qyzdyń anasy usynǵan kadrlar