Jambyl atyndaǵy Qazaq memlekettik akademıalyq fılarmonıasy 89-maýsymyn saltanatty túrde qorytyndylady.
24 maýsymda fılarmonıanyń jetekshi solıseri kórermenderge arnap joǵary deńgeıde konsert usynyp, bir maýsym boıǵy shyǵarmashylyq eńbektiń qorytyndysyn sahna tórinde túıindedi. 89 maýsym – óner ordasy úshin tarıhı, mádenı, rýhanı mańyzǵa ıe kezeń boldy. Óıtkeni, bıyl maýsymnyń úlken jańalyǵy – Jambyl atyndaǵy fılarmonıanyń 90 jyldyq mereıtoıy. Shyǵarmashylyq mekemeniń bir ǵasyrlyq mejege taıaý sapary – qazaq óneri men el mádenıetiniń ósip-órkendeýimen tyǵyz baılanysty.
Qazaq mýzykasynyń negizin qalaýshy tulǵalardan bastap, búgingi kúnniń daryndy jas ónerpazdaryna deıin osy sahnada óner kórsetip, ulttyq mádenıettiń mártebesin bıikke kóterip keledi. Mereıtoılyq 89-shy maýsym sheńberinde QR Mádenıet jáne aqparat mınıstrliginiń qoldaýymen birqatar mańyzdy jobalar júzege asyryldy. Maýsym boıǵy árbir konsert, festıvál, qaıyrymdylyq sharasy – kórermen men óner ujymynyń rýhanı úndestigin, sabaqtastyǵyn aıqyndady.
Jyl basynda bastaý alǵan «Urpaq sabaqtastyǵy» jobasy aıasynda fılarmonıa Almaty qalasyndaǵy birqatar óner oqý oryndarymen birlesip balalarǵa arnalǵan konsertter uıymdastyrdy. Osy bastama aıasynda «Aqsaı» balalar ortalyǵy, «Shańyraq» áleýmettik qyzmet kórsetý ortalyǵy jáne Almaty oblysyndaǵy №1 balalar úıinde qaıyrymdylyq konsertteri ótkizilip, áleýmettik mańyzy zor mádenı baılanystar ornady. Mamyr aıynda B.Baıqadamov atyndaǵy Memlekettik hor kapelasynyń bastamasymen dástúrli «Gúl Almaty. Flower City» balalar men jasóspirimder horynyń festıvali ótti.
Fılarmonıa bıyl alǵash ret beıneleý óneri salasyna da nazar aýdardy. Temirbek Júrgenov atyndaǵy Qazaq ulttyq óner akademıasy jáne Oral Tańsyqbaev atyndaǵy kolejben birlesip uıymdastyrylǵan ashyq aspan astyndaǵy plener – sýretshi jastar úshin shyǵarmashylyq sheberlikterin shyńdaıtyn úlken múmkindikke aınaldy. Qatysýshylar fılarmonıa ǵımaraty men óner ujymdaryn beınelep, mekemeniń shyǵarmashylyq kelbetin kórkem tilde sóıletti. Jáne jas sýretshilerdiń qara shańyraqqa arnaǵan týyndylary jyl boıyna konsertke kelgen kórermenge usynylýda.
Fılarmonıa ujymy tek mádenı sharalarmen shektelmeı, densaýlyq pen ujymdyq birlikti de basty nazarda ustady. Aqpan aıynda qyzmetkerler arasynda ústel tenısi men shahmattan týrnır ótkizildi.
Maýsym aıynda T.Ábdirashev atyndaǵy QR Memlekettik akademıalyq sımfonıalyq orkestri «XX–25» atty halyqaralyq festıvál ótkizdi. Bul sharaǵa shetelde turyp, álemdik sahnalarda óner kórsetip júrgen tanymal skrıpkashylar Merýert Kármenova (Belgıa) men Erjan Kýlıbaev (Ispanıa) arnaıy shaqyrylyp, qazaqstandyq kórermenderge eseli qýanysh syılady. Uıymdastyrýshylardyń aıtýynsha, fılarmonıada ekinshi ret ótkizilip otyrǵan bıylǵy estıvaldiń ereksheligi – shetelde bilim alyp, kásibı tájirıbe jınaǵan qazaq ónerpazdarynyń elge oralyp, ulttyq ónerge úles qosýyna múmkindik jasaý.
Sonymen qatar, shyǵarmashylyq ujymdar ózge qalalar men shet elderdegi tyńdarmandarymyzdy qýantý maqsatynda ónersaparlarǵa baryp, qazaq óneriniń jaýharlarynan pash etip qaıtty. Atap aıtsaq, maýsymnyń saltanatty túrde ashylýynan soń, qazan aıynda B.Baıqadamov atyndaǵy Memlekettik hor kapelasy Qytaı Halyq Respýblıkasy Ýhan qalasyna baryp, konsert berdi. Respýblıka boıynsha QR Memlekettik úrmeli aspaptar orkestri Qaraǵandy qalasynda HHV Halyqaralyq «Mýzykalyq Saryarqa» festıvál aıasynda óner kórsetti.
Jambyl atyndaǵy Qazaq memlekettik akademıalyq fılarmonıasynyń 89-maýsymy – mazmuny baı, maǵynasy tereń, áseri mol kezeń boldy. Alda – uly mereıtoıdyń jalǵasy, 90 jyldyq belestiń bıikke bet alǵan jańa kókjıekteri tur.