Qazaq sport jáne turızm akademıyasynda Sport Consulting Forum qoǵamdyq bírlestígíníń tanystyrylymy óttí, – dep habarlaıdy aqshamnews.kz tílshísí.
Jańa ūıym memlekettík organdardyń, Olımpıada komıtetíníń nemese sport federatsıyalarynyń jūmysyn almastyrmaıdy. Ol ǵylymı-ádístemelík platforma retínde otandyq sporttyń damuyna úles qosudy kózdeıdí. Negízgí maqsat – sportqa beıím daryndy balalardy erte jastan anyqtau, olardyń qabíletín júıelí túrde baqylap, zamanauı ǵylymı ádíster arqyly úlken sportqa baǵyttau.
Ís-sharaǵa memlekettík organ ókílderí, sport ūıymdary, sondaı-aq Qazaqstannyń dańqty sportshylary – Olımpıada oıyndary men álem chempıonattarynyń jeńímpazdary jáne júldegerlerí qatysty. Olardyń qatarynda sporttyq gımnastıkadan bes dúrkín Olımpıada chempıony Nellı Kım, shańǵy jarysynan Olımpıada chempıony Vladımır Smırnov, futboldan Olımpıada chempıony Evgenıı Yarovenko, auyr atletıkadan álemníń tórt dúrkín chempıony Ilya Ilın, Olımpıada oıyndarynyń kúmís júldegerí Islam Baıramukov, grek-rım kúresínen Olımpıada oıyndarynyń kúmís júldegerí Demeu Jadyraev boldy.
Qazaq sport jáne turızm akademıyasynyń rektory, Halyqaralyq dene shynyqtyru jáne sport unıversıtetterí qauymdastyǵynyń prezıdentí, professor Qaırat Zákírıyanov zamanauı sportta ǵylym men jańa tehnologıyalarǵa súıenudíń mańyzy artyp kele jatqanyn aıtty.
“Ǵylymı tásíl, bolashaǵynan úmít kúttíretín balalarǵa monıtorıng júrgízu jáne málímetter bankín qūru – jańa chempıondardyń shyǵuyna úlken septígín tıgízedí”, – dedí ol.
Olımpıada oıyndarynyń kúmís júldegerí Islam Baıramukov sportty nasıhattaudyń da mańyzdy ekenín atap óttí.
“Sporttyń nasıhaty kúshtí boluy kerek. Men mektepte oqyp júrgen kezímde ashana men sportzaldyń ortasynda «Chempıondar alleyasy» degen taqta bolatyn. Onda Olımpıada chempıondarynyń suretterí ílíníp tūratyn. Kún saıyn sol suretterge qyzyǵa qarap ótetínmín. Uaqyt óte kele men de aldyma úlken maqsat qoıdym. Sol bala armanym keıín shyndyqqa aınalyp, Olımpıada tūǵyrynan kóríndím. Sondyqtan qazírgí balalardyń da sportqa, jeńíske degen qyzyǵushylyǵyn arttyru úshín nasıhat jūmysyna erekshe kóńíl bólu qajet”, – dedí Islam Baıramukov.
Konferentsıya barysynda sportshylardy dayarlaudyń jańa modelí qalyptasatyny aıtyldy. Strategıyalyq maqsat retínde 2044 jylǵa qaraı, yaǵnı Qazaq sport jáne turızm akademıyasynyń 100 jyldyq mereıtoıyna oraı, Qazaqstanda álemdík jetekshí ortalyqtarmen básekelese alatyn zamanauı bílím beru jáne sporttyq ǵylymı baza qūru míndetí qoıylyp otyr.
Jıyn sońynda dańqty sportshylar akademıya studentterímen kezdesíp, óz tájírıbelerímen bólístí.