Memleket basshysy Qasym-Jomart Toqaev pen Chehıya Premer-mınıstrí Andreı Babısh shaǵyn qūramda kelíssóz júrgízdí, – dep habarlaıdy aqshamnews.kz tílshísí.
Qasym-Jomart Toqaev Andreı Babıshke íltıpat bíldíríp, Qazaqstan jūrtshylyǵy ony Cheh Respublıkasynda ǵana emes, Europaǵa belgílí sayası qaıratker retínde jaqsy bíletínín jetkízdí.
– Ekí el arasynda būrynnan tyǵyz árí dostyq qarym-qatynas ornaǵan. Sauda-sattyq tabysty damuda. Qos halyqtyń bír bíríne qūrmetí zor. Írí halyqaralyq qūrylymdar sheńberínde bírlese áreket etíp kelemíz. Būl – óte mańyzdy. Elshílíkterímíz belsendí jūmys ístep tūr. Oraıly sáttí paıdalana otyryp, Ózíńízben bírge cheh kásípkerlerínen qūralǵan úlken delegatsıya alyp kelgeníńíz úshín alǵys aıtamyn. Keshe Astanada bıznes-forum óttí. Onyń nátıjesí elderímízge paıdaly bolady dep oılaımyn. Óz tarapymnan san qyrly yntymaqtastyǵymyzdy odan árí damytuǵa bar kúshímdí salamyn, – dedí Prezıdent.
Andreı Babısh qonaqjaılyq tanytqany úshín Qasym-Jomart Toqaevqa rızashylyǵyn bíldíríp, elímízdíń túrlí salada jetken jetístíkteríne joǵary baǵa berdí.
– Qazaqstan – Ortalyq Azıyadaǵy asa mańyzdy memleket. Sondyqtan osynau ǵajap elge saparmen kelu – men úshín zor mártebe. Jaqynda jańa Konstıtutsıya qabyldadyńyzdar. Qūtty bolsyn! Sízderdíń būl baǵyttaǵy tájírıbeleríńíz bízge de paıdaly bolady dep esepteımín. Qazaqstanǵa kelu kópten bergí armanym edí. Óıtkení men unıversıtettí ayaqtaǵannan keıín, yaǵnı, 1978 jyly Shymkent jáne Jambyl (Taraz) qalalarymen ózara baılanys ornatqan departamentte jūmys ístedím. Qazaqstan – energetıka salasynda asa úlken orny bar el, álemdegí uran óndíretín írí memleketterdíń qataryna kíredí. Búgínde atom elektr stantsıyalarynyń mańyzy arta tústí. Sol sebeptí osy salada kelísímge kelgenímízge quanyshtymyn. Qazaqstannyń jasandy ıntellekt baǵytyndaǵy jetístíkterí tańqalarlyq. Ekí elge ortaq dúnıe kóp. Chehıya men Qazaqstan úkímetterí ózara yntymaqtastyqty odan árí ílgeríletu úshín ayanbaı eńbek etedí dep oılaımyn, – dedí ol.