Ís-sharanyń maqsaty — zamandyq bílím beru ınfraqūrylymyn, tehnıkalyq jabdyqtalu deńgeıí men jańa formattaǵy mektepke engízílíp jatqan oqytu tásílderín kópshílíkke kórsetu boldy, – dep habarlaıdy aqshamnews.kz tílshísí.
Jurnalıster Alatau audanyndaǵy jańa mektepterdí kóríp qaıtty. Ís-sharany qalalyq Bílím basqarmasy audandyq bílím bólímímen bírlesíp ūıymdastyrdy. Onda jurnalısterge 2025 jyly «Keleshek mektepterí» ūlttyq jobasy ayasynda salynǵan oqu oryndaryn tanystyrdy.
Ūıymdastyrushylardyń aıtuynsha, qalada qazír 314 myńnan astam oqushy bílím alyp jatqanymen, álí de 31 myńnan astam oryn jetíspeıdí eken.
Būl máselení sheshu úshín qalada jańa mektepter kóptep salynyp jatyr. «Keleshek mektepterí» jobasy ayasynda Almatyda 35 myńǵa juyq oqushyǵa arnalǵan 21 mektep salyndy.
«23 myń oqushyǵa arnalǵan 13 mektep jūmys ístep tūr, taǵy 8-í jańa oqu jylyna deıín ashylady», - dedí bílím bólímíníń basshysy Qarlyǵash Aqmūrzaeva.
Baspasóz tury barysynda Alatau audanyndaǵy mektepterge erekshe nazar audaryldy. Mūnda oryn tapshylyǵy 5 myńnan asypty.
Jańa oqu oryndary qoldanystaǵy mektepterdíń júktemesín azaıtyp, oqushylarǵa qolaıly jaǵdaı jasap otyr.
№213 mekteptíń dırektory Ómírbek Aıtuǵanūlynyń aıtuynsha, oqu orny 2000 oqushyǵa arnalǵan. Qazír mūnda 1625 bala bílím alady, olardyń basym bólígí Terektí shaǵyn audanynan eken.
«Materıaldyq-tehnıkalyq baza tolyq qamtamasyz etílgen. Qauípsízdík deńgeıí joǵary: mektep íshínde 134, syrtynda 43 beınekamera ornatylǵan.
Barlyq júıe polıtsıya men bílím basqarmasymen bíríktírílgen», — dedí ol.
Mektep osy zamanǵy jabdyqtarmen qamtylǵan: 3D-prınterler, lazerlík stanoktar, robototehnıka men drondar bar. Oqu protsesíne jasandy ıntellekt pen vırtualdy shyndyq elementterí de engízíle bastady.
«VR-kózíldíríkter arqyly zerthanady sabaq ótedí, Canva sekíldí qūraldar oqu materıaldaryn daıyndauǵa qoldanylady», — dep qosty dırektor.
Tsıfrlandyru men qauípsízdíkke de erekshe mán berílgen: mektepke kartamen kíredí, ashanada oqushylardyń tamaqtanuyn esepke alu úshín Face ID júıesí qoldanyla bastapty.
Baspasóz turynyń mańyzdy bólígí — ınklyuzıvtí bílím beru barysymen tanysu boldy. Mektepterde sensorlyq bólmeler, sondaı-aq logopedter men defektologtarǵa arnalǵan kabınetter qarastyrylǵan.
«Mūnda balalar jaıly ortada jūmys ísteı alady», — deıdí Ishtvan Qońyr Mandokı atyndaǵy №154 mekteptíń dırektory Qalamqas Almasbaeva.
Ata-analar da jańa mektepterdíń joǵary deńgeıde ekenín atap óttí. №154 mektep oqushysynyń ákesí Elıs Olegovıch bylaı dep alǵan áserín aıtty:
«Ūlym qazírgí baǵdarlamany ıgere almaı qalady dep uaıymdadym. Bíraq bárí qoljetímdí árí qyzyqty bolyp shyqty. Mūnda ata-analar jınalysynyń ózí mereke sıyaqty ótedí eken, ata-analardyń sany da artyp keledí».
Onyń aıtuynsha, mekteptíń jabdyqtaluy balalardy oquǵa yntalandyrady:
«Fızıka, hımıya, bıologıya pánderínde naqty tájírıbeler jasalady, bárín óz kózíńmen kóruge bolady. Sonyń arqasynda bílímdí de jaqsy meńgeredí».
Ol sondaı-aq ūlynyń damuy turaly aıtty:
«Ol robototehnıka men 3D-baspaǵa qyzyǵyp, modeldeumen aınalysyp, saıttar jasaı bastady. Qazírdíń ózínde jeke jobasy bar. Būǵan osyndaǵy bílímníń araqsynda qol jetkízíp otyr».
Jurnalısterge oqushylardyń shyǵarmashylyq bastamalaryn da tanystyrdy. Mektepterdíń bírínde kítaphana men aǵylshyn tílí mūǵalímderímen bírge oqushylar aǵylshyn tílínde shyǵarmalar oqyp, sol boıynsha teatrlandyrylǵan qoıylymdar qoyady.
Balalardyń jeke qabíletín damytuǵa erekshe kóńíl bólínedí. Mysaly, №154 mekteptíń 7-synyp oqushysy Naıl Ǵafıatullın damu erekshelíkteríne qaramastan, aǵylshyn tílínde multfılmderdí dybystap, tíl meńgeru deńgeıí men shyǵarmashylyq qabíletín kórsetíp jatyr.
Baspasóz turynyń qorytyndysy retínde mektepter «Taza Qazaqstan» respublıkalyq ekologıyalyq aktsıyasyna qatysty. Mektepterdíń bírínde «Túlekter alleyasy» ashyldy — būl ūrpaq sabaqtastyǵy men oqushylardyń bílím ordasynyń damuyna qosqan úlesíníń sımvoly.
«Būl bíz úshín mańyzdy kún. Bíz alleya ashyp qana qoımaı, balalarǵa ekologıyalyq mádenıet, jauapkershílík sezímí men komandalyq jūmys daǵdylaryn qalyptastyramyz», — dedí Aıza Mūhtarqūlova.
«Keleshek mektepterí» jobasy ayasyndaǵy mektepter ınklyuzıvtí bílím beruge arnalǵan zamandyq kabınettermen, sonyń íshínde sensorlyq bólmelermen jáne mamandardyń jeke jūmys ísteuíne arnalǵan keńístíktermen jabdyqtalǵan.
Hımıya, bıologıya, fızıka kabınetí, sondaı-aq ūldar men qyzdarǵa arnalǵan sheberhanalar osy zamanǵy tehnologıyamen jabdyqtalǵan. Būl sapaly bílím aluǵa múmkíndík beríp, jaıly bílím beretín orta qalyptastyrady.
№217 mektep oqushylary mektepterín maqtap otyr:
«Men dál osy mektepte oqyp júrgeníme baqyttymyn».
Alatau audanyndaǵy jańa mektepter bílím berudíń zamandyq úlgísín kórsetíp, ár oqushynyń jeke damuyna jaǵdaı jasap otyr.
Búgínde bílím beru salasyndaǵy memlekettík bastamalardyń naqty nátıjelerí kóríníp otyr. «Keleshek mektepterí» jobasy ayasynda tehnologıya, ǵylym men gumanıtarlyq baǵyttarda bolashaq mamandar tárbıeleníp jatyr.