Ózbekstan Respýblıkasynyń prezıdenti Shavkat Mırzıóev Tashkentte World Boxing halyqaralyq federasıasynyń prezıdenti Gennadıı Golovkındi qabyldady, dep habarlaıdy Aqshamnews.kz tilshisi.
Kezdesý barysynda taraptar olımpıadalyq boksty damytý, halyqaralyq yntymaqtastyqty nyǵaıtý jáne ortaq jobalardy iske asyrý máselelerin talqylady. Golovkın Ózbekstannyń Azıadaǵy boksty damytýdaǵy róline erekshe toqtalyp, eldiń álemdik jáne qurlyqtyq deńgeıdegi jarystardy uıymdastyrý tájirıbesin atap ótti.
Sonymen qatar, taraptar sport nysandaryn damytý, olımpıadalyq qozǵalys aıasyndaǵy ózara yntymaqtastyqty júıeleý jáne ortaq jobalardy júzege asyrý baǵyttaryn talqylady.
Golovkın jyly qabyldaýy úshin alǵysyn bildirip, federasıanyń Ózbekstanmen yntymaqtastyqty jalǵastyryp, óńirde boksty damytýǵa arnalǵan jobalardy júzege asyrýǵa daıyn ekenin aıtty. Aıta keteıik, Gennadıı Golovkın Tashkentte jumys saparymen júr jáne buǵan deıin Azıa Olımpıadalyq keńesiniń Bas assambleıasyna qatysqan bolatyn.