Áleumettík jelílerde «Ūshaq 30 mınut keshíkse bılet qūny tolyqtaı qaıtarylady» degen aqparat tarap jatyr. Oǵan saı, būl ózgerís jolaushylardyń qūqyqtaryna qatysty áue kompanıyalaryna engízíletín jańa erejege saı jasalady-mys. Oqyrmannyń sūrauy boıynsha Factcheck.kz aqparattyń rastyǵyn tekseríp kórdí, - dep habarlaıdy aqshamnews.kz tílshísí.
Úkím: Jalǵan
Májílís deputaty Mūrat Ábenov qańtardyń ayaǵynda bolǵan qoǵamdyq palatanyń otyrysynda Reseıdegí áue tasymalyna qatysty «30 mınut» praktıkasyn mysalǵa keltírdí. Keıín 26 qańtarda Facebook-te Kólík mınıstrí Nūrlan Sauranbaevpen bolǵan kezdesude būl praktıkanyń Qazaqstanǵa da kerek ekenín aıtyp, ūsynǵanyn málímdedí. Degenmen būl tek ūsynys qana, eshqandaı zańǵa ózgerís engízílíp, túzetuler jasalǵan joq. Al Reseıde būl ereje 1 nauryzdan bastap kúshíne enedí.
Deputat málímdemesínen keıín Qazaqstandyq bírqatar saıt men paraqsha «Ūshaq 30 mınutqa keshíkse, bılet qūny qaıtarylady» degen taqyrypta jappaı jańalyq jaza bastady. Ábenov mınıstrmen kezdesuden keıín būl máselení deputattarmen talqylap, aldaǵy uaqytta zańǵa túzetuler engízíletíní turaly málímdedí.
Al qazírgí «Áue keńístígín paıdalanu jáne avıatsıya qyzmetí turaly» zańynyń 86-baby, 2-tarmaǵyna sáıkes, tasymaldaushynyń kínásínen reıs 5 saǵattan astam keshíkse jolaushyǵa bılettíń tolyq qūnyn qaıtaruǵa míndettí.
Mūrat Ábenov qandaı másele kóterdí?
23 qańtarda májílístíń bírqatar deputattary «Jolaushylar tasymaly salasyndaǵy avıatsıyalyq qyzmet máselelerí turaly» qoǵamdyq palatanyń otyrysyn ótkízdí. Otyrysta Azamattyq avıatsıya komıtetíníń tóraǵasy 2025 jyldy qorytyndylap, bayandama jasady. Sońynda sóz sóılegen Mūrat Ábenov qaıtarylmaıtyn bıletter men áue kompanıyasy ūsynǵan tarıfter jaıyndy píkír bíldíríp, synǵa aldy. Onyń íshínde «qaıtarylmaıtyn bılet» tarıfí, vaucher men bılet qūny jaıynda másele kóteríp, bıznes múddelerí qarapaıym azamattardyń múddesínen joǵary túratynyn atap óttí. 26 qańtarda Facebook-te osy jónínde kólemdí post jazyp, Kólík mınıstrí Nūrlan Sauranbaevpen bolǵan kezdesude bírqatar punkty ūsynǵanyn jetkízdí. Olardyń arasynda mynadaı ūsynystar bar:
- Shartta barlyq talaptar naqty jalyuy tıís;
- Overbooking úshín aıyppūl salynady, azamattar 1000 AQSh dollaryna deıín ótemaqy aluy tıís;
- Áue kompanıyalaryna reıstí keshíktírse, bortty auystyrsa jáne bagajdy keshíktírse aıyppūl salynuy tıís;
- Bılet aqysyn vaucher júıesímen qaıtarudy tolyǵymen joyu jáne bılet qūnyn 7 kún íshínde tek aqshamen qaıtaruy kerek;
- Áue kompanıyasy reıstí 30 mınutqa keshíktírse bılet qūnyn tolyq óteuge tıís;
- Kez kelgen aıyppūldar men tarıfter kompanıyanyń íshkí qūjattarymen emes, Kólík mınıstrlígí bekítken tasymaldau erejelerímen negízdeluí tıís.
