Mádenıet jáne aqparat mınıstrlígí prodyuser Bayan Alagózovanyń «dínı nasıhatty» retteu turaly ūsynysyna qatysty píkír bíldírdí, – dep habarlaıdy aqshamnews.kz tílshísí.
Mádenıet jáne aqparat vıtse-mınıstrí Qanat Iskakov Qazaqstannyń qūqyqtyq alańynda «dínı nasıhat» degen ūǵym jeke sanat retínde qoldanylmaıtynyn aıtty.
«Bízde dínı nasıhat degen ūǵym joq. Al radıkaldy jáne ekstremıstík aǵymdarǵa kelsek, olarǵa shynymen de tyıym salynǵan», – dep túsíndírdí ol.
Sheneuník Qazaqstannyń kópkonfessıyaly árí tolerantty memleket ekenín eske salyp, dínı saladaǵy máseleler eń aldymen radıkalızmge jol bermeu tūrǵysynan retteletínín atap óttí.
Jekelegen azamattardyń arandatushylyq sıpattaǵy málímdemelerí, sonyń íshínde Nauryz turaly aıtqandary jónínde sóz qozǵaǵan vıtse-mınıstr mūndaı jaǵdaılar boıynsha tıístí tekseru júrgízílíp, zań būzǵandar ákímshílík jauapkershílíkke tartylǵanyn aıtty.
Jurnalıster áleumettík jelílerdegí qoǵamdy adastyruy nemese rezonans tudyruy múmkín kontentke qatysty qandaı da bír shara qoldanyla ma degen saual qoıdy. Qanat Iskakov mūndaı áreketterge qazírdíń ózínde zań ayasynda baǵa berílíp jatqanyn jetkízdí.
«Bíz olardy jauapkershílíkke tartamyz. Būl jalǵan aqparat taratu, áleumettík, dínı jáne ózge de arazdyqty qozdyru sekíldí bírqatar baptarǵa jatady. Sondyqtan mūndaı áreketterde qūqyq būzushylyq qūramy bolsa, míndettí túrde zań ayasynda qaralady», – dedí ol.
Eske salaıyq, nauryz aıynyń ayaǵynda Almaty oblysynda Nauryz merekesíne qatysty dauly vıdeo jarıyalaǵan bloger ūstalǵan bolatyn. Ol vıdeoda būl merekení Qazaqstanda atap ótuge bolmaıtynyn aıtyp, ony «mūsylmandyq mereke emes» dep ataǵan.
Osydan keıín qazaqstandyq ınternet keńístígínde qyzu talqylau bastaldy. Vıdeoda bloger Nauryzdy «qazaqtyń da, mūsylmannyń da merekesí emes» dep, onyń parsylyq, naqtyraq aıtqanda zoroastrızm dástúrínen shyqqanyn alǵa tartqan. Onyń sózínshe, Qazaqstanda mūsylmandarǵa būl kúndí atap ótuge bolmaıdy, al rūqsat etílgen merekeler tek Oraza aıt pen Qūrban aıt qana.
Rolık áleumettík jelílerde tez taralyp, kópshílíktíń ashuyn tuǵyzdy. Qoldanushylar avtordy tarıhty būrmalady, ūǵymdardy shatastyrdy jáne qoǵamǵa jík saluǵa tyrysty dep aıyptady.
Píkírtalastarda Nauryzdyń Qazaqstanda dínı rásím emes, mádenı árí jalpyhalyqtyq mereke retínde qabyldanatyny erekshe aıtyldy.
Syn kúsheıgennen keıín vıdeo óshírílgen.
Íshkí íster mınıstrlígíníń málímetínshe, er adamǵa qatysty dínı arazdyqty qozdyru faktísí boıynsha qylmystyq ís qozǵalǵan. Qazír qajettí tergeu amaldary júrgízílíp jatyr.
Sondaı-aq nauryz aıynyń sońynda Almatyda ózín belgílí bír dínı aǵym ókílí retínde tanystyrǵan er adamnyń qatysuymen taraǵan vıdeoǵa da tekseru júrgízílgen edí. Oǵan ekínshí áıelín shákírtíne «beríp jíbergení» turaly aıtqan sūhbaty sebep bolǵan.
Dín ísterí basqarmasynda mūndaı málímdemeler zań talaptaryn būzady jáne qoǵamǵa qauíp tóndíredí dep baǵalanǵan. Sonyń nátıjesínde er adam ákímshílík jauapkershílíkke tartylyp, aıyppūl salynǵan.