Búgín Almatyda Qazaqstan Táuelsízdígíníń 35 jyldyǵyna arnalǵan «Táuelsízdíktíń 35 jyldyǵy» arnaıy telejobasynyń túsírílímí ótedí, – dep habarlaıdy aqshamnews.kz tílshísí.
«Aıǵaq» telearnasy ázírlep jatqan joba ayasynda Táuelsízdík monumentí men «Táuelsízdík tańy» eskertkíshínde túsírílím júrgízílíp, ǵalym Asyly Osmanmen arnaıy sūhbat ūıymdastyrylady.
Telejoba Qazaqstannyń táuelsízdík jolyndaǵy tarıhı kezeńderín keńínen tanytuǵa, el azattyǵy men memlekettíń qalyptasuyna úles qosqan tūlǵalardyń ónegelí ómírín dárípteuge, sondaı-aq tarıhı oryndardy nasıhattauǵa baǵyttalǵan.
Almatydaǵy túsírílím baǵdarlamasy Respublıka alańyndaǵy Táuelsízdík monumentínen bastalady. 1996 jyly Táuelsízdíktíń bes jyldyǵyna oraı ashylǵan monumenttíń bıíktígí – 28 metr. Onyń tóbesínde qanatty barysty tízgíndegen Altyn adam beınesí ornalasqan.
Joba qatysushylary Sátbaev pen Jeltoqsan kósheleríníń qıylysyndaǵy «Táuelsízdík tańy» eskertkíshíne de barady.
Baǵdarlama ayasynda fılologıya ǵylymdarynyń doktory, professor, Qazaqstannyń eńbek síńírgen qaıratkerí Asyly Osmanmen sūhbat josparlanǵan. Sūhbat barysynda táuelsízdík qūndylyǵy, memlekettík tíl, ūlttyq sana men tarıhı jad máselelerí sóz bolady.
Būdan keıín joba qatysushylary Keńsaı-2 zıratyna baryp, Qazaqstannyń Halyq jazushysy Sherhan Mūrtaza, kórnektí jazushy-dramaturg Oralhan Bókeı, memleket qaıratkerlerí Qalyq Abdullaev pen Berdíbek Saparbaevtyń ruhyna taǵzym etpek.* *
«Táuelsízdíktíń 35 jyldyǵy» telejobasy elímízdíń bírneshe óńírí men írí qalalaryn qamtıdy. Joba avtorlary tarıhı oryndar men tūlǵalar taǵylymyn kórsetu arqyly táuelsízdíktíń qadír-qasıetín jas ūrpaqqa jetkízudí kózdep otyr.