Oqyrman qauymdy ruhanı serpílíske shaqyrdy, dep habarlaıdy aqshamnews.kz tílshísí.
Elímízde Memleket basshysy Qasym-Jomart Toqaevtyń bastamasymen jáne QR Mádenıet jáne aqparat mınıstrlígíníń qoldauymen «Kítap oqıtyn ūlt» respublıkalyq marafony resmı túrde jalauyn jelbírettí. Qoǵamnyń ıntellektualdyq áleuetín arttyrudy, jastar arasynda kítap oqu mádenıetín qalyptastyrudy kózdeıtín būl jobaǵa álemge áıgílí ánshí, elímízdíń maqtanyshy Dımash Qūdaıbergen de qoldau bíldíríp, ózíndík úlesín qosty.
Qaısar ruhtyń sımvoly: «Parasat» sanatyndaǵy tańdau
Dúnıejúzílík sahnalarda qazaq mádenıetín ūlyqtap júrgen Dımash būl joly oqyrman qauymdy ruhanı serpílíske shaqyrdy. Ol auqymdy marafonǵa baıqaudan tys, arnaıy «Parasat» sanaty boıynsha qatysyp otyr. Ánshí óz tańdauyn belgílí suretshí, halyqaralyq yadrolyq qaruǵa qarsy qozǵalystyń belsendísí Kárípbek Kúıíkovtíń «Jızn bez ruk» («Qolsyz ómír») atty avtobıografıyalyq kítabyna túsírdí.
Būl tuyndy — taǵdyrdyń auyr soqqylaryna moıymaı, ómírge degen sheksíz qūshtarlyq pen qajyrly eńbektíń arqasynda bıík belesterdí baǵyndyrǵan tūlǵanyń shynaıy ómírbayany.
Qaraǵandydaǵy kezdesu: Qaısarlyqtan tuǵan tántílík
Dımash Qūdaıbergen Qaraǵandy qalasyna barǵan saparynda Kárípbek Kúıíkovpen arnaıy kezdesíp, emen-jarqyn sūhbattasqan bolatyn. Ánshí būl kezdesuden alǵan áserín jasyrmaı, suretshíníń boıyndaǵy qaısarlyq pen ruh beríktígíne erekshe tántí bolǵanyn jetkízdí. Qos tūlǵanyń júzdesuí tek óner men shyǵarmashylyqtyń ǵana emes, adamgershílík pen ruhanı úndestíktíń de jarqyn úlgísíne aınaldy.
Kítap — kemeldíkke bastar jol
«Marafon kítap oquǵa, taǵylym aluǵa jáne oı bólísuge jol ashsyn!» — dep aq tílegín bíldírgen Dımash osy bastama arqyly qoǵamdy jaqsylyqqa, ízgílíkke jáne bílímge ūmtyluǵa shaqyrdy.
«Kítap oqıtyn ūlt» marafony ayasynda ūsynylǵan būl shyǵarma árbír oqyrmanǵa jíger beríp, qıyndyqtardy jeńuge kúsh-quat syılary sózsíz.