Qazaqstan Respublıkasy Ǵylym jáne joǵary bílím mınıstrlígí Ǵylym komıtetíníń ūıymdastyruymen «Ǵylym ordasy» RMK májílís zalynda «Orta ǵasyrdaǵy túrkí mádenıetíndegí salt attylyq óneríníń fenomení» atty halyqaralyq konferentsıya óttí.
Konferentsıya QR ǴJBM ǴK «Ǵylym ordasy» RMK Bas dırektory, tarıh ǵylymdarynyń kandıdaty Nūrlan Baqytjanūly Seıdínníń qūttyqtau sózímen ashyldy. Ol kíríspe sózínde konferentsıyanyń negízgí maqsatyn aıqyndap, orta ǵasyrlardaǵy túrkí salt attylyq óneríníń tarıhı-mádenı úderísín keshendí taldaudyń, jańa pánaralyq tásílderdí paıymdaudyń, onyń áskerı júıedegí, áleumettík qūrylymdaǵy jáne mádenı mūradaǵy rólín anyqtaudyń mańyzdy míndetterín belgíledí.
Jıynnyń saltanatty ashyluy Abaı atyndaǵy Qazaq ūlttyq pedagogıkalyq unıversıtetí «Shyǵys qoljazbalary» Halyqaralyq derektanu ortalyǵynyń dırektory, PhD doktory Nūrlan Kenjeahmettíń jáne Stambul unıversıtetíníń «Túríktanu» ǵylymı-zertteu ınstıtutynyń dırektory, ǵylym doktory, professor Aısha Furattyń qūttyqtau sózímen jalǵasty.
Konferentsıyaǵa Túrkıyadan kelgen bír top ǵalym arnaıy qatysyp, ǵylymı bayandamalaryn ūsyndy. Al jıynǵa kele almaǵan zertteushíler óz bayandamalaryn onlaın formatta tanystyrdy. Túrkıyadaǵy joǵary oqu oryndarynda qyzmet etetín túrík tílí men ádebıetí salasynyń mamany, oqytushy jáne audarmashy Emdjed Mansur Sheıhoǵlu (Emced Mansur Şeyhoğlu) «Qūtadǵu bílíktegí jylqy jáne atqa mínu mádenıetí» máselesíne toqtalsa, túrík tarıhshysy, akademık jáne sayasattanu salasyndaǵy zertteushí Umut Gyuner (Umut Güner) «Salt atty sopylar jáne olardyń qozǵalys jelílerí: Anadoly Seljúk álemíndegí sopylyq, ahılík jáne atqa mínu mádenıetí» taqyryby boıynsha sóz qozǵady.
Al zertteushí Ibrahım Naderıan (Ebrahim Naderian) «Qashqaı túríkteríndegí at jáne salt attylyq mádenıetí: ortaǵasyrlyq túrkí dástúríníń sabaqtastyǵy men transformatsıyasy» máselesín taldap, zertteu nátıjelerín tanystyrdy.
Konferentsıya jūmysyna tarıh, arheologıya, áskerı antropologıya, mádenıettanu, derektanu jáne ónertanu salalarynyń ókílderí qatysyp, túrkí álemíníń ortaǵasyrlyq at mádenıetí men salt attylyq ónerín, jylqy beınesí men túrlerín ár qyrynan qarastyrdy. Olardyń qatarynda Sh.Uálıhanov atyndaǵy Tarıh jáne etnologıya ınstıtutynyń bas ǵylymı qyzmetkerí, tarıh ǵylymdarynyń doktory Ahmet Toqtabaı, Qazaq ūlttyq agrarlyq zertteu unıversıtetíníń N.O.Bazanova atyndaǵy «Januarlar bıologıyasy» kafedrasynyń professory, auyl sharuashylyǵy ǵylymdarynyń kandıdaty Ishan Qaırat Jálelūly, M.O.Áuezov atyndaǵy Ádebıet jáne óner ınstıtutynyń «Muzykatanu» bólímíníń meńgerushísí, ónertanu ǵylymdarynyń kandıdaty, qauymdastyrylǵan professor Aınūr Jasaǵanbergenqyzy Qaztuǵanova, Nūr-Múbarak Egıpet ıslam mádenıetí unıversıtetíníń Islam ílímderí fakultetí, Islamtanu kafedrasynyń oqytushysy, PhD doktoranty Erkínbek Dáken jáne basqa da zertteushíler boldy.
Jıynǵa moderatorlyq jasaǵan PhD Bekarys Nurımanov ortaǵasyrlardaǵy túrkí halyqtarynyń jylqy ósíru, baptau jáne t.b. derektermen bólístí. Sonymen qatar túrík tílínde jasalǵan bayandamalardy qazaq tílíne audaryp, olardyń mazmūnyn qatysushylarǵa tanystyryp otyrdy.
Halyqaralyq konferentsıya ortaǵasyrlyq túrkí mádenıetíndegí salt attylyq óneríníń tarıhı jáne mádenı mańyzyn ártúrlí ǵylymı baǵyttar toǵysynda qarastyruǵa múmkíndík berdí. Bayandamalarda jylqynyń túrkí halyqtarynyń áskerı, áleumettík jáne mádenı ómíríndegí orny, at ósíru men baptau dástúrlerí, atqa mínu mádenıetíníń tarıhı sabaqtastyǵy, ártúrlí óńírlerdegí kórínísterí, sondaı-aq ónerdegí kórkemdík beınesí sóz boldy. Túrkıyalyq jáne qazaqstandyq zertteushílerdíń píkír almasuy at mádenıetín zerdeleudegí pánaralyq tásílderdíń mańyzyn aıqyndap, ortaǵasyrlyq túrkí mūrasyn jańa ǵylymı qyrynan qarastyruǵa jol ashty. Konferentsıya barysynda kóterílgen máseleler túrkí halyqtarynyń tarıhı-mádenı tájírıbesíndegí jylqy men salt attylyq óneríníń ornyn, onyń ónerdegí kórkemdík beınesí men mádenı mánín tereńírek zertteudíń ózektílígín kórsettí.
Aınūr Qaztuǵanova, M.O.Áuezov atyndaǵy Ádebıet jáne óner ınstıtutynyń «Muzykatanu» bólímíníń meńgerushísí, ónertanu ǵylymdarynyń kandıdaty, qauymdastyrylǵan professor