5 nauryz Almatyda Eríktíler jyly – 2026 saltanatty túrde ashyldy.
Ís-sharaǵa shamamen 450 adam qatysty. Olardyń qatarynda eríktílík ūıym ókílderí, eríktíler qozǵalysynyń úılestírushílerí, belsendí jáne «kúmís» eríktíler, seríktester men memlekettík qūrylymdardyń ókílderí boldy, – dep habarlaıdy aqshamnews.kz tílshísí.
Ís-sharany Almaty qalasy Jastar sayasaty basqarmasynyń qoldauymen Almaty qalasy Eríktíler front-keńsesí ūıymdastyrdy.
Saltanatty rásím eríktíler qozǵalysyn damytudyń jańa kezeńíne resmı bastap, azamattyq qoǵam ókílderín 2026 jyly eríktílík qyzmettí damytudyń bíryńǵaı baǵytyn qalyptastyru úshín bíríktírdí.
Ashylu rásímíne Almaty qalasy ákímíníń orynbasary Abzal Núkenov qatysyp, qoǵamnyń damuyna eríktíler qozǵalysynyń qosyp otyrǵan úlesíníń mańyzdylyǵyn atap óttí.
Onyń aıtuynsha, búgínde eríktílík qozǵalys azamattyq belsendílík pen áleumettík jauapkershílíktíń mańyzdy ınstıtutyna aınalyp keledí.
«Almatyda eríktíler qozǵalysy jyl saıyn nyǵaıyp, myńdaǵan janashyr tūrǵyndy bíríktíríp otyr. Eríktíler áleumettík, ekologıyalyq jáne qalalyq bastamalardy júzege asyruǵa belsendí qatysuda. Ákímdík tarapynan eríktílík ūıymdardy júıelí qoldau jáne eríktíler ınfraqūrylymyn damytu jūmystary jalǵasady», — dedí Abzal Núkenov.
Ís-shara ayasynda qalanyń áleumettík damuyndaǵy eríktílerdíń rólíne arnalǵan forumdyq bólím óttí. Būl alań eríktílík ūıymdar, memlekettík qūrylymdar jáne seríktester arasyndaǵy ashyq dıalogqa múmkíndík beríp, 2026 jylǵa arnalǵan eríktílík qozǵalysty damytudyń negízgí míndetterí men basym baǵyttaryn aıqyndauǵa arnaldy.
Saltanatty rásímmen qatar eríktílík ūıymdardyń jármeńkesí ūıymdastyryldy. Onda qatysushylar jobasy men qyzmet baǵytyn tanystyrdy. Atap aıtqanda, áleumettík eríktílík, sporttyq bastamalar, tótenshe jaǵdaılar men qauípsízdík salasyndaǵy jobalar, sondaı-aq jastar men tsıfrlyq bastamalar ūsynyldy.
Rásímníń basty sımvoldyq sátí — Uaqyt kapsulasy – 2026 salu boldy. Kapsulaǵa eríktílík qozǵalysty damytuǵa arnalǵan strategıyalyq maqsattar men basymdyqtar, sondaı-aq eríktíler ūıymdary jetekshíleríníń úndeuí ornalastyryldy.
Aıta keteıík, Eríktíler jylyn ótkízu būl mádenıettí odan árí damytuǵa, azamattardyń áleumettík bastamalarǵa qatysu ayasyn keńeıtuge jáne qoǵamdaǵy azamattyq belsendílíktí nyǵaıtuǵa baǵyttalǵan.
