Atyraýda massajıst pen klıent arasyndaǵy janjal adam ólimimen aıaqtalǵany anyqtaldy, - dep habarlaıdy Aqshamnews.kz tilshisi «Aq Jaıyq» deregine silteme jasap.
Atyraýda bodı-massaj qyzmetin kórsetken 30 jastaǵy áıelge qatysty qylmystyq is boıynsha jańa derekter shyqty. Buǵan deıin áleýmettik jelide onyń klıentin óltirdi degen aqparat taraǵan bolatyn.
Aldyn ala málimet boıynsha, oqıǵa jaz mezgilinde massaj qyzmetin kórsetetin páterde bolǵan. Áıel men er adamnyń arasynda janjal týyp, sol sátte ol klıentke pyshaq jaraqatyn salǵany aıtylǵan. Jábirlenýshi jedel járdem kelgenshe kóz jumǵan.
Aıtylǵan derekke qaraǵanda, massajıstka ózi polısıa men dárigerlerdi shaqyrǵan. Keıin ony quzyrly organ qyzmetkerleri ustap, tergeý bastalǵan.
Oblystyq sottyń baspasóz qyzmeti bul fakt boıynsha sot óndirisinde is joq ekenin habarlady. Alaıda polısıa tarapynan mundaı oqıǵanyń jazda bolǵany rastaldy.
Qazirgi ýaqytta istiń tolyq mán-jaıy anyqtalyp jatyr.