Atyrau oblysynyń polıtsıyasy Qyzylqoǵa audanynda būryn habar-osharsyz ketken erlí-zaıyptynyń máıítterí tabylǵanyn rastady, dep habarlaıdy Aqshamnews.kz tílshísí.
Polıtsıya málímetínshe, 1959 jyly tuǵan Maqsot Qarabalın men 1961 jyly tuǵan jūbaıy Nasıpa Óteshqalıevanyń denelerí anyqtalǵan. Qazírgí tańda oqıǵa ornynda qūqyq qorǵau organdary men jedel qyzmet ókílderí tergeu jūmystaryn júrgízíp jatyr.
Atalǵan derek boıynsha Qylmystyq kodekstíń «Adam óltíru» baby boıynsha ís qozǵaldy. Kúdíktílerdíń jeke basy anyqtalyp, olardy ūstau baǵytynda tıístí sharalar qabyldanuda.
Jergílíktí basylymdar erlí-zaıyptylardyń máıítterí sharuashylyqqa arnalǵan qūrylys aulasynda kómílgen boluy múmkín ekenín jazǵan. Alaıda būl aqparatty qūzyrly organdar ázírge resmı túrde rastaǵan joq.
Sonymen qatar, qazírgí uaqytta joǵalǵan otbasynyń taǵy ekí múshesí – 1990 jyly tuǵan Meıramgúl Qarabalına men 1993 jyly tuǵan Nauryz Mūqanǵalıevtí ízdeu jūmystary jalǵasyp jatyr.
Polıtsıya azamattardy tek resmı aqparatqa ǵana súıeníp, áleumettík jelílerde rastalmaǵan málímetterdí taratpauǵa shaqyrdy.
Eske salaıyq, 25 jeltoqsanda Atyrau qalasynyń tūrǵyny polıtsıyaǵa aryz túsíríp, aǵasy men onyń otbasy músheleríníń bír aıdan astam uaqyt boıy habarsyz ketkenín habarlaǵan. Osyǵan baılanysty 5 jeltoqsanda qylmystyq ís tírkelíp, tergeu bastalǵan bolatyn.