Ótken ǵasyr qazaq halqy úshín eń auyr kezeńderdíń bírí boldy. Asharshylyq, quǵyn-súrgín, soǵys - tūtas bír buynnyń taǵdyryn ózgerttí. Sol dáuírdíń bar auyrtpalyǵyn bastan ótkeríp, keıín el ǵylymyna eńbek síńírgen jandardyń bírí – soǵys ardagerí Zūlqarnaı Seıítov. Jeńístí jaqyndatuǵa úles qosqan jan búgínde 103 jasta.
Ol 1922 jyly dúnıege kelgen. Zūlqarnaı atanyń auqatty árí baı dúnıege keluí onyń otbasy men taǵdyryna áset etpeı qoımady. 1930 jyldardaǵy solaqaı sayasattyń zardabyn Seıítovter otbasy da tartty. Tárkíleu, kámpeske men asharshylyq olardyń áuletín de aınalyp ótpedí. Otbasy úlken shyǵynǵa ūshyrap, jaqyndarynan aıyryldy.
«Asharshylyq pen tárkíleu kezínde otbasymyzdan 15 adamnan aıyrylǵan ekenbíz. Ájem – ákemníń anasy, ekí qaryndasy ashtyqtan qaıtys bolǵan. Ákemdí aman alyp qalǵan – naǵashylary eken», - deıdí ūly Talǵat Seıítov.
Talǵat aǵanyń sózínshe, ákesí Zūlqarnaı Seıítov mektepte 10-synyp oqyp júrgen kezínde 1942 jyly maıdanǵa shaqyrylǵan. Áskerı daıyndyqtan keıín bírden alǵy shepke jíberílíp, Lenıngrad, Stalıngrad, Kursk baǵyttaryndaǵy shaıqastarǵa qatysqan. Soǵysty Berlınde ayaqtaıdy.
«Ákem Stalıngradtaǵy auyr shaıqastardy basynan ótkergen. Berlınge jetkende «Qarǵys atqan Germanıya» degen jazudy óz kózímen kórgenín aıtatyn», - deıdí estelíkterdí eske alǵan qarıyanyń ūly Talǵat Seıítov.
Soǵystan keıín Zūlqarnaı Seıítov bílímín jalǵastyryp, Omby auylsharuashylyq akademıyasyna túsedí. Maıdannan oralǵan Zūlqarnaı Seıítov soǵys qatysushysy retínde konkusssyz oqu múmkíndígín paıdalanyp, endígí ǵūmyryn ízdeníske arnaıdy. Aıta ketetíní, Z.Seıítov sol kezeńderde óz qatarlastarynyń arasynda Stalındík stıpendıyanyń jalǵyz ıegerí atanady. Keıín ınstıtutty ayaqtaǵan soń, oqu ornynyń ūsynysymen aspıranturada oquyn jalǵastyryp, ómírín bírjola bıohımıya salasyna arnaıdy.
Keıínnen Almatyǵa auysyp, ūzaq jyldar boıy ǵylym men bílím salasynda eńbek ettí. Eńbek jolyn assıstenttíkten bastap, professor, kafedra meńgerushísí dárejesíne deıín kóteríldí. Kóptegen shákírt tárbıelep, ǵylymǵa úles qosty.
Zūlqarnaı Seıítov – 350-den astam ǵylymı eńbektíń avtory. Ol sút jáne sút ónímderíníń bıohımıyasyn zerttep, sıyr, bıe jáne túıe sútíníń qūramyn ǵylymı tūrǵyda alǵash zerttegen ǵalymdardyń bírí boldy. Būl eńbekterí ūlttyq ónímderdí ǵylymı negízde damytuǵa jol ashty.
Ǵalymnyń jańalyqtary joǵary baǵalanyp, ol KSRO Halyq sharuashylyǵy jetístíkterí kórmesíníń altyn medalímen marapattaldy, sondaı-aq «KSRO-nyń eńbek síńírgen ónertapqyshy» ataǵyna ıe boldy. Onyń qorjynynda kóptegen patentter men avtorlyq kuálíkter bar.
Qarıya zeınetke shyqqanan keıín de ūzaq jyldar magıstrler men bolashaq ǵalymdardy daıyndap, bar bígení men túıgenín bólísken. Oǵan dálel ózíníń bıohımıya salasynda jazǵan oqulyǵyn aǵylshyn tílínde shyǵarudy qolǵa aluy edí.
«Júz jasqa keler shaǵynda «Bıohımıya» oqulyǵy aǵylshyn tílínde jaryq kórdí. Onyń basy-qasynda da ózí júrdí», – deıdí Talǵat Seıítov.
Ǵalym ūlttyq ónímder negízínde «Qazaq balzamy» men «Altynsu» sıyaqty emdík susyndardy ázírleuge qatysqan.
«Sol kezeńderde shet elderdíń kóbínde emdík maqsattaǵy balzamdar bolatyn Ákem «basqa elderdíń atymen atalatyn balzamdar bar, nege bízde qazaq balzamy joq?» dep jıí aıtatyn. Sol oı úlken jūmysqa ūlasty», – deıdí ūly.
Būl bastama bastapqyda Almaty zooveterınarlyq ınstıtutynyń basshylyǵy arqyly qoldau tauyp, keıín sol kezdegí Dínmūhamed Qonaevqa jetkízílgen. Qoldau nátıjesínde Shyǵys Qazaqstanda dárílík shópter jınalyp, tájírıbelík óndírís ūıymdastyrylyp, emdík qasıetí bar jańa óním jasaldy.
Búgínde 103 jasqa kelgen Zūlqarnaı Seıítov - bír dáuírdíń ǵana emes, sol dáuírdíń bar auyrtpalyǵyn ıyǵymen kóteríp, ony ǵylym men bílímge aınaldyra bílgen tūlǵa. Asharshylyq pen quǵyn-súrgíndí bastan ótkeríp, jas kezínde maıdanǵa attanyp, el qorǵau jolynda erlík kórsetken ol keıín beıbít ómírde ǵylymǵa adal qyzmet ettí. Onyń ómír joly – qıyndyqqa moıymaǵan, kerísínshe sol synaqtardy el ıgílígíne jūmsaı bílgen qaısar buynnyń aıqyn beınesí.
Maıdandaǵy erlígí úshín Zūlqarnaı Seıítov II dárejelí «Otan soǵysy» ordenímen, «Qyzyl Jūldyz» ordenímen, «Erlígí úshín» jáne «Germanıyany jeńgení úshín» medaldarymen marapattalǵan. Būl nagradalar onyń soǵys jyldaryndaǵy batyldyǵy men janqıyarlyǵyn aıǵaqtaıdy.