Ǵylymı-praktıkalyq konferentsıya «Júrek jáne mı» Azıya qoǵamy men Almaty qalalyq Jedel shūǵyl kómek kórsetu auruhanasynyń bírlesuímen, qalalyq Qoǵamdyq densaulyq saqtau basqarmasynyń qoldauymen ūıymdastyryldy, – dep habarlaıdy aqshamnews.kz tílshísí.
Alqaly jıynnyń ashylu rásímínde Almaty qalasy Qoǵamdyq densaulyq saqtau basqarmasynyń basshysy Marat Pashımov, QJShKKA dırektory Almaz Djuvashev, sondaı-aq S.D.Asfendıyarov atyndaǵy QazŪMU júıke aurulary kafedrasynyń professory, «Nevrologtar qauymdastyǵy» QB prezıdentí Erkín Nūrǵujaev sóz sóıledí.
«Búgínde medıtsına keshendí tásíldí talap etedí. Bír dıagnozdyń artynda bírneshe auru boluy múmkín. Sondyqtan mı aurularyn emdeude pánaralyq yqpaldastyq asa mańyzdy», – dep atap óttí Marat Pashımov.
Al Almaz Djuvashev konferentsıyanyń praktıkalyq mańyzyn tílge tıek ettí.
«Būl – tek ǵylymı alań ǵana emes, kúndelíktí klınıkalyq tájírıbemen tyǵyz baılanysty mańyzdy kezdesu. Jedel jaǵdaılarda mamandardyń úılesímdí jūmysy men naqty sheshímder qabyldauy sheshushí ról atqarady», – dedí ol.
Konferentsıya jyl saıyn damyp, kásíbı qauymdastyqty bíríktíretín mańyzdy halyqaralyq alańǵa aınalyp keledí. Bıyl forumǵa shamamen 300-ge juyq maman qatysty.
Konferentsıyanyń bastamashysy – medıtsına ǵylymdarynyń kandıdaty, nevrolog Aıgúl Qūdaıbergenova. Onyń aıtuynsha, joba pandemıya kezeńínde onlaın formatta bastalyp, búgínde jandy dıalog ornatyp, tájírıbe almasudyń tıímdí alańyna aınalyp úlgerdí.
«Būl tek bílím beru alańy ǵana emes, kásíbı qarym-qatynas pen tájírıbe almasudyń keńístígí. Multıdıstsıplınarlyq tásíldí damytu medıtsınalyq kómektíń sapasyn arttyruǵa tíkeleı áser etedí», – dedí ol.
Konferentsıyaǵa Tbılısı memlekettík unıversıtetíníń professory, Ūlttyq endokrınologıya ınstıtutynyń ǵylymı jetekshísí Elena Gıorgadze (Gruzıya), Luızıana memlekettík unıversıtetí medıtsına ortalyǵynyń professory, somnologıya bólímíníń jetekshísí Oleg Chernyshev (AQSh), nevrolog, University College London nevrologıya ınstıtutynyń klınıtsıst-zertteushísí Rauan Qaıyrjanov (Ūlybrıtanıya), Oklahoma unıversıtetíníń professory, ınsult ortalyǵynyń jetekshísí Evgenıı Sıdorov (AQSh), Henry Ford Hospital tamyrlyq nevrologıya bólímíníń dárígerí Raman Sıngh (AQSh) syndy sheteldík sarapshylar da qatysty.
Olar bayandamalarynda endokrındík būzylystardyń áserí, ūıqynyń rólí, nevrologıyadaǵy zamanauı zertteuler, ınsulttík kómektí ūıymdastyru jáne qaıtalama aldyn alu máselelerín qamtydy.
Ǵylymı baǵdarlama ayasynda dementsıya, ınsult, metabolıkalyq būzylystar, sondaı-aq medıtsınadaǵy tsıfrlyq tehnologıyalar men jasandy ıntellekttí engízu máselelerí aıtyldy.
Almaty qalalyq Jedel shūǵyl kómek kórsetu auruhanasynyń mamandary da bayandama jasady. Atap aıtsaq, joǵary sanatty nevrolog, ınsult bólímshesíníń meńgerushísí Lázzat Ayaǵanova sozylmaly sana būzylystary máselesíne toqtaldy. 2-sanatty radıolog dáríger Dmıtrıı Gebel moyamoya auruy boıynsha klınıkalyq jaǵdaıdy ūsyndy. Al kardıolog Farıda Rustamova Aıgúl Qūdaıbergenovamen bírlesíp ınsulttan keıíngí patsıenttí pánaralyq júrgízu máselelerín talqylady.