Qazírgí tańda jobaǵa qatysuǵa 32 adam ótíním bergen– dep habarlaıdy aqshamnews.kz tílshísí.
Jobany Almaty qalasy Jastar sayasaty basqarmasy Qazaqstan Respublıkasy Parlamentí Senatynyń qoldauymen júzege asyryp otyr. Maqsat – megapolıstíń ornyqty damuyna baǵyttalǵan sheshímder ázírleı alatyn kásíbı sarapshylar qauymdastyǵyn qalyptastyru. Būl qalalyq ortanyń sapasyn arttyrudan bastap, bolashaq ekonomıkasyn damytu, mádenı strategıyany jetíldíru jáne qalanyń halyqaralyq brendıngín damytuǵa deıíngí baǵyttardy qamtıdy.
Ūıymdastyrushylardyń aıtuynsha, «Taldau mektebí. Almaty» — memlekettík basqaru júıesíne analıtıkalyq mádenıet pen data-driven tásílderdí engízuge baǵyttalǵan júıelí jūmystyń bír parasy. Oqu baǵdarlamasy 2026 jyly 16 mamyr men 20 mausym aralyǵynda oflaın formatta ótedí.
Oqu barysynda qatysushylar aldynda memleket qaıratkerlerí, halyqaralyq ūıym ókílderí jáne Qazaqstannyń jetekshí sarapshylary dárís oqıdy. Jobaǵa joǵary bílímdí, kemínde 5 jyl eńbek ótílí bar, 40 jasqa deıíngí jáne taldau, strategıyalyq oılau, data-driven tásílder baǵytynda kásíbı qabíletín jetíldíruge yntaly jas mamandar shaqyrylady.
Úmítkerlerge qoıylatyn negízgí talaptar: joǵary bílím, kemínde 5 jyl jūmys tájírıbesí, urbanıstıka, ekologıya, turızm, tsıfrlyq ekonomıka, kreatıvtí ındustrıya jáne ózge de salalardyń bírínde kásíbı qūzyrettílík, sondaı-aq baǵdarlamaǵa tolyqtaı oflaın formatta qatysuǵa daıyn bolu.
Baǵdarlama ayasynda qatysushylar derekterdí jınau men taldaudyń qoldanbaly ádísterín meńgeríp, qalany damytuǵa qatysty naqty keıstermen jūmys ísteıdí, praktıkalyq ūsynystar ázírlep, úzdík sheshímderdí Almaty qalasynyń ákímíne ūsynu múmkíndígíne ıe bolady.
Íríkteu nátıjesínde barlyǵy 60 qatysushy anyqtalady. Ótíním 2026 jyly 26 sáuírge deıín qabyldanady. Qatysu úshín www.jastaralmaty.kz saıtynda ótíním toltyryp, túıíndeme, motıvatsıyalyq jáne ūsynym hattardy tírkeu qajet.
Tolyq aqparatty +7 707 514 9193 telefon nómírí arqyly bíluge bolady.