Almatyda mańyzdy ınfraqūrylymdyq jobalardyń bírí - batys káríz kollektorynyń qūrylysy bastaldy. , – dep habarlaıdy aqshamnews.kz tílshísí.
Būl turaly qalalyq Energetıka jáne sumen jabdyqtau basqarmasynyń ókílderí aıtty.
Jobanyń merdígerí — «Pavlodar ózen porty» AQ. Qazírgí kezeńde dıametrí 600 mm bolatyn ózdígínen aǵatyn káríz jelísín salu boıynsha qūrylys-montaj jūmystary júrgízílude. Jūmystar Nauryzbaı audanynda Stroıtelnaya kóshesí boıymen — Abaı dańǵylynan Alatau dańǵylyna deıíngí aralyqta atqaryluda (K72–K95 uchaskelerí).
Qūrylys jūmystaryna baılanysty kóshe-jol jelísíníń keıbír bólíkterínde qozǵalys uaqytsha shekteledí. Qala tūrǵyndary men qonaqtarynan ózgerístí eskeríp, baǵytyn aldyn ala josparlau sūralady.
Jobanyń strategıyalyq mańyzy zor. Qazírgí uaqytta Nauryzbaı jáne Alatau audandarynyń bírqatar aumaǵynda jetkílíktí quattaǵy magıstraldyq káríz júıesí joq, al qoldanystaǵy jelíler halyq sanynyń ósuí men qarqyndy qūrylysqa baılanysty shamadan tys júktememen jūmys ístep tūr.
Joba ayasynda Jandosov kóshesínen qalalyq tazartu qūrylystaryna deıín jalpy ūzyndyǵy 35 shaqyrym bolatyn kollektor salu kózdelgen. Qūrylysta zamanauı materıaldar qoldanylady. Sonymen qatar Alǵabas shaǵynaudanynda káríz sorǵy stantsıyasynyń qūrylysy qatar júrgízílude.
Joba tolyq júzege asqannan keıín:
— shamamen 200 myń tūrǵyn ortalyqtandyrylǵan su būru júıesíne qosylady;
— sanıtarlyq-epıdemıologıyalyq jaǵdaı jaqsarady;
— ınjenerlík jelílerdíń senímdílígí artady;
— apat pen rūqsatsyz tógíndíler qaupí azayady;
— audandardyń odan árí damuyna jol ashylady.
Qūrylys jūmystary tyǵyz qonystanǵan aumaqta, kólík qozǵalysy joǵary uchaskelerde jáne qoldanystaǵy ınjenerlík jelíler mańynda júrgízílude. Keıbír kezeńderde jūmystar qauípsízdík talaptaryn tolyq saqtaı otyryp, edáuír tereńdíkte atqarylady.
Barlyq jūmys bekítílgen jobalyq-smetalyq qūjattamaǵa jáne qoldanystaǵy qūrylys normalaryna saı júzege asyryluda. Engízílgen uaqytsha shekteuler qalanyń senímdí árí zamanauı ınjenerlík ınfraqūrylymyn qalyptastyruǵa baǵyttalǵan.