Almaty ákímdígí Shūǵyla shaǵynaudanyndaǵy «Sensata City» tūrǵyn úı keshení tūrǵyndarynyń Ūlyqbek kóshesín ūzartu úshín jergílíktí bılík tūrǵyn úı kesheníne tıesílí jerdí alyp jatyr degen shaǵymyna túsíníkteme berdí, – dep habarlaıdy aqshamnews.kz tílshísí.
Nauryzbaı audanynyń 2014 jyly qūrylǵany belgílí. Sol kezde qalanyń Bas josparyna sáıkes ázírlengen egjeı-tegjeılí josparlau jobasynda Ūlyqbek kóshesín Momyshūly kóshesínen qala shekarasyna deıín ūzartu qarastyrylǵan.
2021 jyly qalalyq Sáulet jáne qala qūrylysy basqarmasy «Sensata City» tūrǵyn úı kesheníníń qūrylysyna arnalǵan jobalau aldyndaǵy qūjattardy bergen.
Tūrǵyn úı kesheníníń eskızdík jobasy josparlanyp otyrǵan Ūlyqbek kóshesíníń qyzyl syzyq shekarasyna deıíngí qala qūrylysy shekteulerín eskere otyryp kelísílgen. Yaǵnı, tūrǵyn úı kesheníníń ońtústígíndegí aumaq bastapqyda jol saluǵa arnalǵan, sondyqtan ony ózge maqsatta paıdalanu qarastyrylmaǵan.
Osyǵan baılanysty tūrǵyndardyń úı mańyndaǵy aumaqqa tıesílí jerlerdí ıelíkten shyǵaru turaly málímdemesí shyndyqqa janaspaıdy.
Bekítílgen eskızdík jobaǵa sáıkes «Sensata City» tūrǵyn úı keshenínde 334 avtotūraq orny qarastyrylǵan. Avtotūraq oryndarynyń jetíspeushílígíne qatysty máselení tūrǵyndar qūrylys salushy kompanıyamen azamattyq-qūqyqtyq tártípte sheshuí qajet.