2025 jyldyń qańtar-qazan aralyǵynda Almatynyń ónerkásiptik óndiris kólemi 1 944,2 mlrd teńgege jetip, 12,3%-ǵa artty. Óńdeý ónerkásibi 13,7%-ǵa ósip, jalpy ónerkásiptik shyǵarylymnyń 84,5%-dan astamyn qamtamasyz etti. Bul týraly Almaty qalasynyń Kásipkerlik jáne ınvestısıalar basqarmasynyń ókilderi habarlady.
Ásirese, mashına jasaý, mıneraldyq ónim, sýsyn, qaǵaz buıymdary, hımıalyq jáne farmasevtıkalyq ónim, sondaı-aq toqyma, kıim jáne aǵashtan jasalǵan buıym óndirisinde joǵary ósim baıqalady.
Sektordaǵy ósim qalanyń iri jáne orta ónerkásiptik alańdaryndaǵy ónim óndirý kóleminiń artýymen qamtamasyz etildi. Buǵan dılerler, qurylys kompanıalary jáne saýda jelileri tarapynan tapsyrystyń kóbeıýi de yqpal etti.
Jyl basynan beri ındýstrıalyq aımaqta jáne «Inovasıalyq tehnologıalar parki» arnaıy ekonomıkalyq aımaǵynda jalpy quny 225,3 mlrd teńge bolatyn 8 joba iske qosyldy. Jyl sońyna deıin 80,2 mlrd teńge kólemindegi taǵy 10 jobany engizý josparlanyp otyr.
Indýstrıalyq aımaq aýmaǵynda jalpy quny 655,8 mlrd teńge bolatyn jáne ondaǵan myń jumys ornyn qurǵan júzden astam kásiporyn jumys isteıdi. Bıyl jańa nysandar paıdalanýǵa berilip, 3 myńnan astam jumys orny ashyldy, sondaı-aq shaǵyn ónerkásiptik parkter iske qosyldy.
«Inovasıalyq tehnologıalar parki» arnaıy ekonomıkalyq aımaq aýmaǵynda sıfrlyq tehnologıa, kún panelderi jáne medısınalyq jabdyq óndirý salalarynda jobalar júzege asyryldy. Jyl sońyna deıin taǵy eki jańa ınvestısıalyq jobany iske qosý kózdelgen.
Qazirgi kezde «Inovasıalyq tehnologıalar parki» arnaıy ekonomıkalyq aımaǵynda 193 qatysýshysy tirkelgen (onyń ishinde 126 qatysýshy eksterrıtorıaldy qyzmet atqarady). Salynǵan ınvestısıa kólemi 258 mlrd teńgege, taýar, jumys jáne qyzmet óndirisiniń kólemi 1 trln teńgege jetti. Eksport kólemi 17,8 mlrd teńge, salyq túsimi 72 mlrd teńge, 6 974 jumys orny ashyldy.