Almatynyń zańgerlerí jańa konstıtutsıya jobasy boıynsha 15 nauryzda ótetín referendumǵa qazaqstandyqtardy belsendí túrde qatysuǵa shaqyrdy, – dep habarlaıdy aqshamnews.kz tílshísí.
Olardyń aıtuynsha, ūsynylyp otyrǵan ózgeríster zamandyq syn-qaterge jauap beredí, azamattardyń qūqyǵyn qorǵaudy kúsheıtíp, memlekettík basqaru men sot júıesín anaǵūrlym tūraqty árí ádílettí etedí eken.
Memlekettík jáne konstıtutsıyalyq qūqyq salasynyń sarapshysy Raushan Ábubákírqyzy jańa konstıtutsıya jobasy uaqyt talabyn eskeríp, bılíktíń tūraqtylyǵy men azamattardyń qauípsízdígín qamtamasyz etetínín atap óttí.
«Prezıdenttíń jarlyǵymen jańa konstıtutsıya jobasy boıynsha referendum 15 nauryzǵa belgílendí. Vıtse-prezıdent lauazymy engení negízgí ózgerístíń bírí boldy. Būl memlekettíń qauípsízdígín qamtamasyz etedí. Mūndaı mańyzdy árí írgelí normalar negízgí zańda bekítíluí tıís dep sanaımyn. Būl sheshímder el men qoǵamnyń múddesíne saı keledí», — deıdí ol.
Sarapshynyń aıtuynsha, konstıtutsıya jobasynda tsıfrlandyru jaǵdaıyndaǵy azamattardy qorǵauǵa erekshe nazar audarylǵan.
«Qazír ūyaly telefon men ınternettí paıdalanatyn ár adam kún saıyn kıbershabuyl qaupíne tap bolady. Jańa konstıtutsıyada kıberqauípsízdík kepíldíkterí qarastyrylǵan, memleket azamattardy tsıfrlyq keńístíkte qorǵau míndetín ózíne alady. Būl osy zamanǵy syn-qaterler men qoǵamnyń naqty sūranysyna berílgen jauap. Sondyqtan men referendum men jańa konstıtutsıyany qoldaımyn», — dedí Raushan Ábubákírqyzy.
«Zakon ı pravo» advokattyq keńsesíníń dırektory Ǵalymjan Sarjanov ta píkír bíldíríp, sot júıesíndegí ózgerísterge nazar audardy.
«Zańgerlík tájírıbede sot protsesí barysynda sudyalar azamattardyń uájín árdaıym tolyq tyńdaı bermeıtín. Jańa konstıtutsıya jobasy būl máselení sheshken. 78-bapta sudyalardyń taraptardyń barlyq dálelí men talap-aryzyn míndettí túrde tyńdauy kerektígí naqty bekítílgen», — dedí ol.
Zańger referendumǵa qatysu — eldíń qūqyqtyq júıesíníń bolashaǵyna tíkeleı yqpal etu múmkíndígí ekenín atap óttí.
«Būl normalar azamattardyń qūqyǵyn qorǵaudy kúsheıtíp, sotqa degen senímdí arttyrady. Sondyqtan 15 nauryzda barshańyzdy referendumǵa kelíp, jańa konstıtutsıyany qoldauǵa shaqyramyn. Sot tórelígíníń sapasy men memlekettíń damuy da soǵan qarap tūr», — deıdí Ǵalymjan Sarjanov.
