23 mamyr kúní Bostandyq audanynyń №70 jalpy bílím beretín mektebínde «Balalar qauípsízdígí – basty nazarda!» atty ınteraktıvtí kvest óttí.
6 «Á» synyp oqushylary, sondaı-aq «Jas saqshy» jasaǵynyń múshelerí bír kúnge tártíp saqshysynyń rólín somdap kórdí, dep habarlaıdy aqshamnews.kz.
Kvest barysynda oqushylar bala qūqyqtary men tótenshe jaǵdaılardaǵy mínez-qūlyq erejelerí jóníndegí bílímderín kórsettí. Olar zańdy jáne zańsyz áreketterdí senímdí túrde ajyratyp, baıqaǵyshtyq, saqtyq jáne qauíptí jaǵdaıda áreket etu qabíletterín kórsettí. Sonymen qatar, balalar qarym-qatynas jasau daǵdylary men kómekke júgínu algorıtmín jaqsy meńgergenderín dáleldedí.
Kórermender oqushylardyń azamattyq ūstanymy qalyptasqanyn jáne aınalasyndaǵylardyń qauípsízdígíne jauapkershílíkpen qaraıtynyn atap óttí.
Komandalyq jūmys, marshruttyq paraqtar, oıyn tapsyrmalary jáne jas azamattyń anty ís-sharany barlyq qatysushylar úshín paıdaly ǵana emes, naǵyz qyzyqty árí áserlí ettí.
— «Barlyq komandalar sertıfıkattarmen marapattaldy, al eń belsendí qatysushylarǵa gramotalar men kuboktar tabystaldy. Kvesttí ūıymdastyru men ótkízuge mūǵalímder men vojatyılar úlken úles qosty», — dedí №70 mektep dırektory Zauresh Beısembaeva. — «Osyndaı ís-sharalar balalarda qauípsíz mínez-qūlyq mádenıetín jáne qūqyqtyq sauattylyqty qalyptastyruǵa yqpal etedí».
Qūqyq tártíbín qamtamasyz etu úshín mektep Bostandyq audany polıtsıya basqarmasynyń qyzmetkerlerímen tyǵyz jūmys ísteıdí. Olardyń bastamasymen «Jas saqshy» jasaǵy qūrylǵan bolatyn. Oqu jyly boıy yuvenaldy polıtsıya jasaq múshelerímen ǵana emes, bastauysh synyp oqushylarymen de profılaktıkalyq áńgímeler júrgízíp otyrdy. Balalarǵa sabaqtan qalmau, keshíkpeu, mektep tártíbín saqtau, qauíptí zattar ákelmeu, mektep múlkíne ūqypty qarau jáne mūǵalímder men oqushylarǵa qūrmetpen qarau úıretíledí. Polıtsıya formasyn kıyudíń ózí balalarǵa erekshe jauapkershílík júkteıdí.
— «Ár mekteptíń pedagogıkalyq ūjymynyń basty míndetí – árbír balanyń qauípsízdígín qamtamasyz etu. Ol úshín keshendí tásíl qajet. Almaty qalasynyń bílím basqarmasy megapolıstegí barlyq mektepterdí kúzetpen, turnıkettermen jáne beınebaqylau kameralarymen qamtamasyz ettí. Sondaı-aq oqushylarmen jáne olardyń ata-analarymen júıelí jūmys júrgízílude», — dep atap óttí Bostandyq audanynyń bílím bólímíníń basshysy Aıgúl Qasymbek. — «Mektepterde qauípsíz orta qalyptastyru maqsatynda túrlí jaǵdaılardaǵy mínez-qūlyq erejelerín úıretetín synyp saǵattary ótkízíledí. Jalpy mekteptík ata-analar jınalystarynda otbasynda, mektepte, aulada jáne qoǵamda qauípsízdík mádenıetín tárbıeleu boıynsha ūsynystar beríledí. Ata-analar balasynyń kímmen dos ekenín, qalaı júretínín, qaıda baratynyn, ne alyp júretínín jáne mínez-qūlqynda qandaı da bír ózgeríster bar-joǵyn bíluí tıís».