Almatyda áleumettík tólem men járdemaqy alatyndardyń sanyr sany 692 myńǵa juyqtady, – dep habarlaıdy aqshamnews.kz tílshísí.
Būl rette bír adam memlekettík qoldaudyń bírneshe túrín qatar ala alady. Óńírlík kommunıkatsıyalar qyzmetí alańynda Almatydaǵy áleumettík qorǵau salasyndaǵy retteu men baqylau komıtetí departamentíníń basshysy Mūrat Mūratbekov osylaı dep málímdedí.
Spıkerdíń aıtuynsha, áleumettík qorǵau júıesí azamatty dúnıege kelgen sátten bastap zeınetke shyqqanǵa deıín ómír boıy súıemeldeıdí. Memleket bala tuu men onyń kútímíne baılanysty járdemaqy tóleıdí, kópbalaly otbasylarǵa, múgedektígí bar bala tárbıelep otyrǵandarǵa, múgedektígí bar azamattar men asyraushysynan aıyrylǵan otbasylarǵa qoldau kórsetedí.
«Almatydaǵy ár otbasy ómírínde míndettí túrde áleumettík qoldau júıesíne júgínedí. Bírí bala tuǵanda járdemaqy rásímdeıdí, endí bírí zeınetke shyǵady, taǵy bíreuí múgedektíkke nemese asyraushysynan aıyryluyna baılanysty osyndaı memlekettík qoldau alady», – deıdí Mūrat Mūratbekov.
Departament basshysynyń aıtuynsha, bıylǵy bírínshí jarty jyldyqta almatylyqtarǵa bala tuu men bala kútímíne baılanysty 16 107 járdemaqy, 9 510 memlekettík bazalyq zeınetaqy, jasyna baılanysty 8 661 zeınetaqy tólemí, jerleuge arnalǵan 4 857 bírjolǵy tólem, múgedektíkke baılanysty 1 945 járdemaqy men kópbalalylarǵa 1 926 járdemaqy taǵaıyndalǵan.
Áleumettík salany damytudyń negízgí baǵytynyń bírí – tsıfrlandyru. Qazír zeınetaqy men áleumettík qamsyzdandyru salasyndaǵy memlekettík qyzmettí elektrondyq úkímet portaly, «Azamattarǵa arnalǵan úkímet» memlekettík korporatsıyasy, ekínshí deńgeılí bankterdíń mobıldí qosymshasy, sondaı-aq proaktıvtí jáne avtomattandyrylǵan formattar arqyly aluǵa bolady.
«Qazír zeınetaqy men áleumettík qamsyzdandyru salasyndaǵy memlekettík qyzmettíń shamamen 40 paıyzyn memlekettík organǵa júgínbeı-aq aluǵa bolady. Bıylǵy jyldyń bírínshí jartyjyldyǵynda kórsetílgen 49 021 qyzmettíń 19 337-sí proaktıvtí formatta nemese memlekettík organdarǵa barmaı-aq jáne qūjat jınamaı-aq taǵaıyndaldy», – dep atap óttí spıker.
Departamenttíń málímetínshe, keńes aluǵa kóbíne zeınetkerler, zeınetke shyǵuǵa daıyndalyp júrgen azamattar, balaly otbasylar, múgedektígí bar bala tárbıelep otyrǵan otbasylar men asyraushysynan aıyryluyna baılanysty járdemaqy alatyndar júgínedí. Negízgí sūraq eńbek ótílín rastauǵa, eńbek kítapshasyn taldau men zeınetaqy tólemíníń dūrys esepteluíne qatysty tuady eken.
Mūrat Mūratbekov áleumettík tólemdí ataulylyq qaǵıdaty men zańdylyq negízínde taǵaıyndau máselesíne de toqtaldy. Tsıfrlandyru men baqylaudy kúsheıtu ayasynda departament 7 myńnan astam zeınetaqy ísín tekserdí. Sonyń nátıjesínde 82 jaǵdaıda jalǵan qūjatty paıdalanu faktísí anyqtalyp, artyq tólengen qarajat kólemí 108 mln teńgení qūrady. Qazírgí uaqytta onyń 70 mln teńgesí byudjetke qaıtaryldy.
«Memlekettík byudjetten bólíngen ár teńge zań boıynsha ony aluǵa qaqyly azamattarǵa ǵana beríluí tıís», – dep atap óttí departament basshysy.
Sóz sońynda spıker proaktıvtí túrde tólemdí taǵaıyndau ayasyn keńeıtu, mekemearalyq derekter almasudy jetíldíru, azamattarǵa kórsetíletín qyzmet sapasyn arttyru men memlekettík qyzmettí odan árí tsıfrlandyru áleumettík qorǵau júıesín odan árí damytuǵa sep bolatynan aıtty.