29 sáuír kúní Almatynyń Túrksíb audanyndaǵy Aeroportovskoe kólínde Tótenshe jaǵdaılar departamentí men QR TJM «Barys» respublıkalyq qūtqaru qyzmetíníń kúshterí qatysqan taktıkalyq oqu-jattyǵu bolyp óttí, – dep habarlaıdy aqshamnews.kz tílshísí.
Onda adamdy qūtqaryp, alǵashqy kómek kórsetíp, oqys oqıǵa bola qalǵanda arnauly qyzmetterdíń qalaı jūmys ísteıtíní pysyqtaldy. Óńírlík kommunıkatsıyalar qyzmetíníń ókílderí osy jattyǵudy kóríp qaıtty.
Oqu-jattyǵu barysynda jasóspírímder arasynda aldyn alu jūmysy men qauípsíz mínez-qūlyq mádenıetín qalyptastyruǵa nazar audaryldy. Ís- sharaǵa jaqyn mańdaǵy mektepterdíń 8–11 synyp oqushylary tartyldy.
TJD Tótenshe jaǵdaıdy joyu basqarmasynyń bastyǵy Denıs Yartsevtíń aıtuynsha, shomylu mausymynyń qarsańynda ótíp jatqan oqu-jattyǵu jūmysy balalardyń jazǵy demalysty qauípsíz ótkízuíne baǵyttalypty.
«Suǵa shomylatyn mausymnyń jaqyndaǵandyqtan adamdardy qūtqaru jaǵyn qaıta bír pysyqtap alyp, ony balalarmen bírlesíp ótkízdík osy joly. Ís-shara ayasynda oqushylarǵa suǵa ketkende alǵashqy medıtsınalyq kómek kórsetudíń jolyn, sudaǵy qauípsízdík erejelerín, sondaı-aq zardap shekkenderge kómek kórsetudíń tásílín kórsettík», — deıdí Denıs Yartsev.
Ol Aeroportovskoe kólí shomyluǵa rūqsat etílgen orynǵa jatpaıtynyn, bolashaqta ony qaıta jańǵyrtu josparlanyp otyrǵanyn da aıtty.
QR TJM «Barys» respublıkalyq qūtqaru qyzmetíníń súńguír-qūtqaru bólímshesíníń jetekshísí Andreı Bybchenko jazataıym oqıǵanyń aldyn aluǵa múmkíndík beretín negízgí qauípsízdík erejelerín atap óttí.
«Shomylu mausymy bastalǵanda eń bastysy — qarapaıym erejení saqtau kerek: kún ótíp, dene qatty qyzyp ketpeuí kerek, suǵa da bírden qoıyp ketpeńíz. Temperatura kúrt ózgergende dene qūrysyp, adam esínen tanyp qalady. Būryn suǵa túsíp kórmegen jerge baryp suǵa túspeu kerek. Ondaı jerde qūtqarushylar bolmaıdy. Suǵa súńgígen kezde jaraqat alyp, bír nársege ílíníp qaluyńyz ábden múmkín», — dep eskerttí Andreı Bybchenko.
Ol suǵa batyp bara jatqan adamdy qūtqaru erejesíne de erekshe toqtaldy.
«Adamdy art jaǵynan ūstau qajet, betpe-bet kelseńíz qūtqarushynyń ózín ūstap alyp, bírge batyp ketuí múmkín. Eger óz kúshíńízge senímdí bolmasańyz, dereu jedel qyzmetterdí shaqyryp, oqıǵa ornyn naqty habarlap aıtu kerek. Būl kómektíń tez jetuíne yqpal etedí», — dep keńes berdí qūtqarushy.
Sonymen qatar, maman tau ózenderíníń asa qauíptí ekenín eskertíp, suy suyq, aǵysy qatty, túbí tasty bolyp keletín jerlerge jolamau kerektígín aıtty. Mūndaı jerde ayaq taıyp ketíp, aǵys alyp ketuí múmkín, ondaı kezde suǵa ketken adamdy qūtqaru jaǵy da qıyndap ketedí.
Oqu-jattyǵu ayasynda medıtsına qyzmetkerlerí suǵa batqan adamǵa alǵashqy kómek kórsetu algorıtmín tájírıbe júzínde kórsettí.
«Eń aldymen tynys alu jolyn sudan tazartyp, tynys alyp jatqanyn, tamyry soǵyp tūrǵanyn tekseríp alu qajet. Bolmasa bírden júrek-ókpe reanımatsıyasyn bastap, jedel járdem shaqyru kerek», — dep atap óttí QR TJM Apattar medıtsınasy ortalyǵynyń qyzmetkerí Perızat Babaqūl.
Ís-sharaǵa qatysqandar jattyǵudy erekshe yqylaspen baqylap, mamandardy mūqıyat tyńdap, alǵan bílímderí aldaǵy uaqytta kádege jaraıtynyn atap óttí. Mysaly, oqushy Anastasıya Kovaleva suǵa batyp bara jatqan adamdy dūrys qūtqaru tehnıkasyn, atap aıtqanda art jaǵynan ūstau qajettígín, sondaı-aq ókpege jasandy tynys berudí úırengenín aıtty.
Mūndaı oqu-jattyǵu tótenshe jaǵdaı áreket etudí tájírıbe júzínde pysyqtap, jasóspírímderdí qūtqaru men ózín-ózí qorǵaudyń negízgí daǵdylaryn úıretuge múmkíndík beredí. Mamandar sudaǵy qauípsízdík erejesín saqtap, rūqsat etílgen jerde ǵana shomyluǵa shaqyrdy.