Almaty qalasy Balalar shūǵyl medıtsınalyq kómek kórsetu ortalyǵynyń dárígerlerí balalar alańyndaǵy karuselden qūlap, auyr jaraqat alǵan 9 jastaǵy balanyń ómírín saqtap qaldy, – dep habarlaıdy aqshamnews.kz tílshísí.
Búıregí jyrtylyp, aǵzasynan aıyrylyp qalu qaupí tóngeníne qaramastan, mamandar onyń jaǵdaıyn tūraqtandyryp, zaqymdanǵan búıregín saqtap qaldy.
Dárígerlerdíń aıtuynsha, bala jedel járdem qyzmetímen auruhanaǵa auyr halde jetkízílgen. Oǵan bírneshe auyr jaraqat dıagnozy qoıyldy: sol jaq búıregíníń soǵylyp, jyrtyluy, ísh quysynyń jaraqaty, íshkí aǵzalardyń zaqymdanuy, jabyq bas súıek-mı jaraqaty, mı shaıqaluy jáne jaraqat saldarynan bolǵan shok.
Tekseru barysynda balanyń auyr íshkí jaraqat alyp, íshíne qan ketkení anyqtaldy. Jaǵdaıy óte kúrdelí bolǵandyqtan, shūǵyl túrde em júrgízu qajet edí. Osyǵan baılanysty bírneshe márte dárígerlík keńes ótíp, mamandar ota jasau jónínde sheshím qabyldady.
Aldymen balaǵa sol jaq nesepaǵaryna stent qoıyldy. Būl ota 45 mınutqa sozyldy. Kelesí kúní hırurgter búırektegí jyrtylǵan tūsty tígu úshín ekí saǵatqa sozylǵan kúrdelí ota jasady. Dárígerlerdíń negízgí maqsaty - balanyń ómírín saqtap qalyp, zaqymdanǵan aǵzany aman alyp qalu boldy.
Mamandar 20 kún boıy balanyń ómírí úshín kúrestí. Der kezínde kórsetílgen medıtsınalyq kómek pen dárígerlerdíń úılesímdí jūmysynyń arqasynda onyń jaǵdaıy bírtíndep jaqsara bastady.
Qazír bala sauyǵyp keledí. Al dárígerler auyr jaraqat saldarynan jyrtylǵan búırektí saqtap qalyp, sırek kezdesetín nátıjege qol jetkízdí. Būl - kásíbı sheberlík pen uaqtyly qabyldanǵan sheshímníń jemísí.