Almaty qalasynyń Óńírlík kommunıkatsıyalar qyzmetí alańynda múgedektígí bar adamdar men basqa da júríp-tūruy shekteulí azamattar úshín qoljetímdí jáne kedergísíz orta qalyptastyru máseleleríne arnalǵan brıfıng óttí, – dep habarlaıdy aqshamnews.kz tílshísí.
Spıker retínde Qazaqstan Respublıkasy Halyqty áleumettík qorǵau salasyndaǵy retteu jáne baqylau komıtetíníń Almaty qalasy boıynsha departamentíníń basshysy Mūrat Mūratbekov qatysty.
Departament basshysynyń aıtuynsha, áleumettík jáne kólík ınfraqūrylymy nysandarynyń qoljetímdílígín qamtamasyz etu - memlekettík áleumettík sayasattyń negízgí baǵyttarynyń bírí árí qoǵam damuy deńgeıíníń mańyzdy kórsetkísh.
«Qoljetímdílík máselesí - būl tek zań talaptaryn oryndau ǵana emes. Būl - adam qadír-qasıetíne degen qūrmettíń jáne barlyq azamattarǵa teń múmkíndíkter qaǵıdatyn júzege asyrudyń kórsetkíshí», - dep atap óttí Mūrat Mūratbekov.
Búgínde Almatyda múgedektígí bar 60 myńdaı adam tūrady. Olar úshín qoljetímdí orta qala íshínde óz betínshe qozǵalu, memlekettík jáne áleumettík qyzmetterdí alu, jūmys ísteu, bílím alu jáne qoǵamdyq ómírge belsendí qatysu múmkíndígín bíldíredí.
Departament áleumettík ınfraqūrylym nysandarynda qoljetímdílík talaptarynyń saqtaluyna memlekettík baqylau júrgízedí. Tekseruler josparly jáne jospardan tys tártíppen ótkízílíp, mamandar míndettí túrde nysandarǵa baryp tekseredí.
2026 jyldyń basynan berí áleumettík ınfraqūrylymnyń 45 nysanyna tekseru júrgízíldí. Baqylaushy organnyń nazarynda densaulyq saqtau, bílím beru, mádenıet, sport mekemelerí, memlekettík ūıymdar, qyzmet kórsetu jáne kásípkerlík salasynyń nysandary boldy.
Tekseru barysynda pandustar men kótergísh qūrylǵylardyń bar-joǵyna, jaı-kúıíne, kíreberís aımaqtardyń qoljetímdílígíne, sanıtarlyq-gıgıenalyq bólmelerdíń jabdyqtaluyna, qyzmetkerlerdí shaqyru túımeleríníń, taktıldí kórsetkíshterdíń, múgedektígí bar adamdarǵa arnalǵan avtotūraq oryndarynyń boluyna, sondaı-aq kóru jáne estu qabíletí būzylǵan adamdar úshín aqparattyń qoljetímdílígíne erekshe nazar audaryldy.
Tekseru nátıjesínde 32 nysanǵa anyqtalǵan zańbūzushylyqtardy joyu turaly oryndauǵa míndettí nūsqamalar beríldí. Taǵy 6 subekt ákímshílík jauapkershílíkke tartyldy. Salynǵan aıyppūldardyń jalpy somasy - 2 mln 76 myń teńge.
Sonymen qatar, spıkerdíń aıtuynsha, vedomstvonyń negízgí maqsaty aıyppūl saludy emes, qoldanystaǵy kedergílerdí joyu jáne azamattardyń qajettí qyzmetterge naqty qol jetkízuín qamtamasyz etudí kózdeıdí.
Qazaqstan Respublıkasynyń zańnamasynda múgedektígí bar adamdar úshín nysandardyń qoljetímdílígín qamtamasyz etu talaptaryn saqtamaǵany úshín ákímshílík jauapkershílík kózdelgen. Aıyppūl mólsherí qūqyq būzushynyń sanatyna qaraı 50-den 400 aılyq eseptík kórsetkíshke (AEK) deıín ózgeredí. Bír jyl íshínde zańbūzushylyq qaıtalansa, aıyppūl kólemí edáuír artady.
Departamentte atap ótkendeı, berílgen nūsqamalar oryndalmaǵan jaǵdaıda baqylau tekserísterí júrgízílíp, Qazaqstan Respublıkasynyń Ákímshílík qūqyq būzushylyq turaly kodeksíne sáıkes qosymsha sharalar qabyldanady.
Kedergísíz orta qalyptastyru memleket áleumettík sayasatynyń mańyzdy míndetteríníń bírí bolyp qala beredí. Almatyda barlyq sanattaǵy azamattar úshín qalalyq ınfraqūrylymnyń qoljetímdílígín qamtamasyz etu jūmystary júıelí túrde jalǵasatyn bolady.