Óńírlík kommunıkatsıyalar qyzmetí alańynda Almaty qalasy Bílím basqarmasynyń strategıya jáne kásíptík bílím beru bólímíníń basshysy Erík Ábíshaev tehnıkalyq jáne kásíptík bílím beru (TjKB) júıesín memlekettík qoldau men kolledj ınfraqūrylymyn damytu barysy turaly bayandady.
Spıkerdíń aıtuynsha, 2026 jyly TjKB júıesíníń byudjetí 53,3 mlrd teńgení qūraǵan. Būl tegín bílím aluǵa qoljetímdílíktí keńeıtíp, studentterge áleumettík qoldaudy kúsheıte túsuge múmkíndík beríptí.
"Tehnıkalyq jáne kásíptík bílím beru salasyndaǵy memlekettík sayasat ár studenttíń úı-íshíne salmaq salmaı, sūranysqa ıe bolyp otyrǵan mamandyqty oqyp, olardyń barynsha bílím alyp, júríp-tūruyna qajettí jaǵdaı jasauǵa baǵyttalǵan", – dep atap óttí Erík Ábíshaev.
Qazír Almatydaǵy 88 kolledjde 86 myńnan astam student bílím alyp jatyr. Olardyń 58%-y memlekettík bílím beru tapsyrysy ayasynda tegín oqıdy. 2025 jyly memlekettík tapsyrys boıynsha 17 491 student qabyldanyp, aldynǵy jylmen salystyrǵanda joǵary kórsetkíshtí kórsettí.
"Būl ár jastyń úı-íshíne salmaq salmaı, sapaly kásíptík bílím aluyna naqty múmkíndík beretín qadam. Kadr dayarlau ekonomıkanyń basym salalary boıynsha 131 mamandyq pen 220 bílíktílíktí qamtıdy, būl jastardyń eńbek naryǵynda sūranysqa ıe qūzyretterdí meńgeruíne jol ashady", – deıdí.
Kolledj ınfraqūrylymyn damytuǵa da erekshe kóńíl bólíngen. Byltyr memlekettík kolledjderdí jóndeu men jabdyqtauǵa jergílíktí byudjetten 2,4 mlrd teńge bólíndí. Áleumettík áríptesterdíń esebínen tórt kolledjdíń materıaldyq-tehnıkalyq bazasy da 538 mln teńgege jańartyldy.
"Bíz oqu korpustaryn, sheberhanalar men zerthanalardy bírtíndep jańǵyrtyp jatyrmyz. Būl oqytu men bílím berudí eńbek naryǵyndaǵy zaman talabyna sáıkestendíruge sep bolady", – deıdí spıker.
Studentterdíń jataqhanamen qamtylu máselesín sheshu maqsatynda 1 720 orynǵa arnalǵan segíz jańa jataqhana salu da josparlanyp otyr. Byltyr 120 oryndyq jataqhanasy bar jańa kolledj paıdalanuǵa berílgen bolatyn.