Almatyda Qazaqstandaǵy alǵashqy krematorıı jaqyn arada jūmysyn bastaıdy. Būl turaly qalalyq Qoǵamdyq densaulyq saqtau basqarmasy málímdedí, - dep habarlaıdy aqshamnews.kz tílshísí.
Vedomstvonyń málímetínshe, 9 qańtarda Ádílet mınıstrlígínde Ūlttyq ekonomıka mınıstrlígíníń būıryǵy tírkelgen. Qūjatta jerleu jáne qabírlerdí kútíp-ūstau ísín ūıymdastyrudyń qaǵıdalaryna ózgeríster engízu kózdelgen.
Qabyldanǵan túzetuler krematorıılerdíń qyzmetíne qūqyqtyq negíz qalyptastyryp, Qazaqstan aumaǵynda krematsıya rásímín alǵash ret zańnamalyq deńgeıde júrgízuge múmkíndík beredí.
"Būıryq kúshíne engennen keıín Almatydaǵy krematorıı jūmysyn bastap, sanıtarlyq jáne qūqyqtyq talaptardy saqtaı otyryp, belgílengen tártíppen qyzmet kórsetedí", – delíngen habarlamada.
Sonymen qatar, qazír Almaty qalalyq patologoanatomıyalyq byurosynyń baıqau keńesí arqyly krematsıya qyzmetteríníń baǵalar tízbesín bekítu rásímí jalǵasyp jatyr.
Tarıfter men qyzmet kórsetu tártíbí turaly aqparat Almaty qalalyq patologoanatomıyalyq byurosynyń resmı saıtynda jarıyalanatyn bolady.
Eske salaıyq, 2025 jylǵy qyrkúıekte Almatynyń kommunaldyq ınfraqūrylym jáne tūrǵyn úı ınspektsıyasy basqarmasy aldaǵy alty-jetí jylda qaladaǵy zırattarda marqūmdardy jerleuge oryn qalmaıtynyn málímdegen edí. Olardyń deregínshe, 2025 jylǵy jaǵdaı boıynsha Almatyda 70 zırat bar, sonyń 61-í jabylǵan. Jańa zırattarǵa arnalǵan jer telímderí bekítílíp jatyr, alaıda olar Almaty oblysynyń aumaǵynda ornalasady.