Almaty qalasy polıtsıya departamentíníń kıberqylmysqa qarsy ís-qımyl basqarmasynyń qyzmetkerlerí abonenttík nómírlerdí jappaı tírkeuge baılanysty zańsyz árekettíń jolyn kestí.
Nómírler keıín alayaqtyq shemalarda paıdalanylǵan, – dep habarlaıdy aqshamnews.kz tílshísí Polisia.kz-ke sílteme jasap.
Jedel-ízdestíru ís-sharalary barysynda qala tūrǵyny ūstaldy. Odan ártúrlí baılanys operatorlaryna tıesílí kóp mólsherdegí SIM-kartalar, sondaı-aq olardy tírkeu men íske qosuǵa paıdalanylǵan mobıldí qūrylǵylar tárkílendí. Tergeu barysynda anyqtalǵandaı, áıel adam ınternet arqyly ūsynylǵan "qashyqtan tabys tabu" turaly habarlandyruǵa jauap bergen.
Belgísíz kuratorlardyń nūsqauymen ol aqshalaı syıaqy úshín SIM-kartalar satyp alyp, olardy messendjerlerde tírkep, rastau kodtaryn úshínshí tūlǵalarǵa beríp otyrǵan. Anyqtalǵandaı, belsendírílgen abonenttík nómírler keıín túrlí qylmystyq shemalarda, sonyń íshínde azamattarǵa jasalǵan alayaqtyq qońyraularda paıdalanylǵan. Sot sheshímímen áıel kínálí dep tanylyp, úsh jyl merzímge bas bostandyǵynan aıyryldy.
– Kópshílík mūndaı “jūmysty” zıyansyz dep qabyldaıdy, alaıda ís júzínde olar qylmysqa sybaılas bolyp shyǵady. Árbír berílgen rastau kody — azamattardy aldaudyń bír qūraly, — dedí Almaty qalasy PD kıberqylmysqa qarsy ís-qımyl basqarmasynyń bastyǵy Ánes Qaldybaev.