Respublıkalyq mańyzy bar avtomobıl joldarynda qozǵalys qauípsízdígín qamtamasyz etu jáne su tasqyny men erígen sulardy ótkízu úshín auqymdy daıyndyq júrgízíldí, – dep habarlaıdy aqshamnews.kz tílshísí.
Būl turaly Ortalyq kommunıkatsıyalar qyzmetínde ótken dóńgelek ústelde QR Kólík mınıstrlígí Avtomobıl joldary komıtetíníń tóraǵasy Tólegen Abdullın málímdedí.
Spıkerdíń atap ótuínshe, «bízdíń joldarda 1300-den astam kópír jáne shamamen 15 myń su ótkízu qūbyry ornalasqan, onyń 97%-y ashylyp, tazartyldy. 2022 jyldan bastap su tasqyny qaupí bar uchaskelerdíń sany 396-dan 229-ǵa deıín qysqardy».
2025 jyly 582 su ótkízu qūbyry qoıyldy: onyń 162-sí rekonstruktsıyalau sheńberínde, 54-í kúrdelí jóndeu kezínde jáne 366-sy ortasha jóndeu kezínde ornatyldy. 2026 jyly taǵy 200-ge juyq qūbyrdy jóndeu josparlanuda. Bes kópírge kúrdelí jóndeu júrgízíldí: tórteuí – Shyǵys Qazaqstan oblysyndaǵy «Óskemen – Rahman qaınary» avtojolynda jáne bíreuí – Qostanaı oblysyndaǵy «Qostanaı – Áulıekól – Sūrǵan» jolynda.
Tólegen Abdullınníń sózínshe, «su tasqyny kezeńíne joldardy qorǵau úshín 86 myń tekshe metrden astam materıal daıyndaldy: 16 myń tekshe metr qūm, 23 myń tekshe metr qūm-qıyrshyq tas qospasy, 40 myń tekshe metr but tasy jáne 5 myń tekshe metr qıyrshyq tas. Sondaı-aq 280 myń qap daıyndaldy. Jedel áreket etu úshín 2 myńnan astam tehnıka daıyn tūr».
Daıyndyq jūmystar jergílíktí mańyzy bar joldarda da júrgízílude. Qazírgí tańda shamamen 280 su tasqyny qaupí bar uchaske erekshe baqylauda, qajettí ınerttí materıaldar men qaptar daıyndalǵan, 3 myńǵa juyq tehnıka bírlígí jūmyldyrylǵan. Su ótkízu qūrylystaryn tazalau jáne qauíptí uchaskelerdí daıyndau jūmystary jalǵasuda.