Almaty qalasynyń polısıa departamentinde jýrnalıser men blogerlik qaýymdastyq ókilderimen kezdesý ótti, - dep habarlaıdy Aqshamnews.kz
Basqosýdyń negizgi ózegi – aldaǵy josparlar, komýnıkasıalyq strategıany damytý jáne qoǵammen ózara is-qımyldyń jańa formattary. Almaty qalasy PD bastyǵy Aıdyn Kabdýldınov óz sózinde Almaty qalalyq PD-nyń aqparattyq saıasaty kóptegen jyldar boıy basym baǵyttardyń biri retinde júıeli túrde qalyptasyp kele jatqanyn atap ótti.
– Belgilengen baǵyt saqtalyp qana qoımaı, odan ári kúsheıtiledi. Basymdyqtar qatarynda – zamanaýı komýnıkasıa quraldaryn damytý, áleýmettik jelilerdegi belsendi jumys, profılaktıkalyq jáne túsindirý jobalary, balalar qaýipsizdigine, jol qaýipsizdigine erekshe nazar aýdarý, alaıaqtyq pen esirtki qylmysyna qarsy kúres bar, – dedi Aıdyn Kabdýldınov.
Kezdesýdiń jeke bir bóligi komýnıkasıalyq strategıaǵa arnaldy. Ol ashyqtyq, jedeldik jáne qoljetimdilik qaǵıdattaryna negizdelgen. Polısıanyń mindeti – tek oqıǵalar týraly habarlaý emes, sonymen qatar túsindirý, aldyn alý jáne azamattarǵa qaýipsizdik máselelerinde durys baǵdar berýge kómektesý. Kezdesý qatysýshylary quqyq buzýshylyqtardyń aldyn alý jáne polısıaǵa degen qoǵamdyq senimdi nyǵaıtý isinde buqaralyq aqparat quraldary men blogerlermen seriktestiktiń mańyzyn atap ótti.
– Alda – jańa jobalar, tyń formattar men ıdeıalar bar. Negizgi maqsat – polısıany halyqqa odan ári jaqyndatyp, qoǵammen turaqty ári senimdi dıalog ornatý, – dep túıindedi Aıdyn Kabdýldınov.