Almatyda jeke sektordaǵy órt qauípsízdígín arttyru boıynsha júıelí jūmys jalǵasyp keledí. Búgín Aqbūlaq shaǵynaudanynyń tūrǵyndaryna jylytu qūrylǵysyn dūrys paıdalanu erejesí túsíndírílíp, úıíne gaz jáne kómírtek totyǵynyń taraluyn anyqtaıtyn datchıkter ornatyla bastady.
Tótenshe jaǵdaılar departamentíníń qyzmetkerlerí kún saıyn jeke sektorda profılaktıkalyq túsíndíru jūmystaryn júrgízedí. Ásírese, demalys kúnderí būl sharalar qarqyn ala túsedí, óıtkení tūrǵyndar úıde bolǵan osy kezde kópshílíkke qauípsízdík talaptary aıtylyp, qajet bolsa datchıkter ornatylady.
– Qys mezgílínde jylytu qūrylǵysyn dūrys paıdalanbau saldarynan órt qaupí artady. Sol sebeptí bíz negízgí órt qauípsízdígí talaptaryn túsíndíríp, qatty otynmen nemese tabıǵı gazben jūmys ísteıtín jylytu júıeleríníń árdaıym jaramdy kúıde boluyn qadaǵalau qajettígín aıtamyz, - dedí Almaty qalasy TJD memlekettík órt baqylau basqarmasynyń basshysy, azamattyq qorǵau podpolkovnıgí Konstantın Kanın.
Sondaı-aq, ol mūndaı júıelerdí qarausyz qaldyruǵa bolmaıtynyn, ásírese úıde kíshkentaı balalar bolsa, erekshe saq bolu kerektígín eskerttí.
Aqbūlaq shaǵynaudanynda TJD mamandary kezektí aldyn alu sharasyn ótkízíp, álí gaz júıesíne qosylmaǵan úılerdí aralady. «QazaqGaz Aimaq» AQ kompanıyasynyń qyzmetkerlerímen bírlesíp, tūrǵyndarǵa túsíndíru jūmystary júrgízílíp, qauípsízdík datchıkterí ornatylyp jatyr.
– Belgí berushí qūrylǵy úı íshínde gazdyń tarala bastaǵanyn anyqtaıdy da, gaz berudí bírden toqtatatyn qaqpaqshaǵa belgí beredí, - dedí qūrylǵynyń jūmys ísteu tetígín túsíndírgen gaz kompanıyasynyń apattyq-dıspetcherlík qyzmetíníń jetekshí ınjenerí Sūltanbek Baıǵazıev.
Ol sondaı-aq, tūrǵyndar gazdyń taraluyn anyqtaıtyn datchıkterdí ornatu úshín úı íshíndegí gaz jabdyǵy qyzmetíne júgínuge bolatynyn eske saldy.
Bír kúnde mamandar 60 jeke úıdí aralap, 10 kómírtek totyǵy datchıgín ornatty. Jyl basynan berí MIB, PIK jáne kondomınıumdarmen bírlesíp 2 771 adam qatysqan 165 jınalys pen kezdesu ótkízíldí.
2018 jyldan berí qala jáne audan ákímdíkteríníń qoldauymen almatylyqtardyń úıíne 1 628 kómírtegí totyǵy datchıgí ornatyldy. Qosymsha taǵy 642 qūrylǵy satyp alynyp, qala audandaryna datchık ornatu jūmystary jalǵasady.
Almatynyń eń osal tūrǵyn aımaqtarynda órt qauípsízdígín kúsheıtu men úıdí qajettí datchıkpen jabdyqtau jūmystary jalǵasa beredí. Būl órt qaupín azaıtyp, tūrǵyndardyń alańsyz ómír súruíne septígín tıgízedí.