Búgín Almaty joǵary azamattyq belsendílík tanytyp otyr. Kóktemgí salqynǵa qaramastan tańnan bastap megapolıstegí referendum uchaskelerínde adamdar legí baıqalady. Ásírese, jas almatylyqtar belsendílígímen kózge túsíp otyr. Olardyń kópshílígí úshín būl referendum ómíríndegí alǵashqy mańyzdy sayası qadamdardyń bírí boldy, – dep habarlaıdy aqshamnews.kz tílshísí.
№667 komıssıyanyń tóraıymy Nūrbanu Omarova úderís zań talaptaryna qatań sáıkes ūıymdastyrylǵanyn, al dauys berushíler úshín barlyq jaǵdaı jasalǵanyn, onyń íshínde merekelík atmosfera men arnaıy fotoaımaqtar qarastyrylǵanyn atap óttí.
«Búgín bízdíń uchaskede barlyq qajettí jaǵdaı jasalǵan. Saǵat 7:00-de dauys beru bastalǵan sátten bastap azamattardyń joǵary belsendílígín baıqap otyrmyz. Komıssıya múshelerí men baqylaushylar jūmysyna uaqytyly kírísíp, tártíptíń saqtaluyn qadaǵalap otyr», – dedí ol.
Qalanyń kóptegen uchaskesínde dauys berushíler úshín shaǵyn merekelík atmosfera qalyptasqan. Estelík suretke túsuge arnalǵan fotoaımaqtar ūıymdastyrylyp, alǵashqylardyń bírí bolyp kelgenderge jáne alǵash ret dauys beruge qatysqan jastarǵa sımvolıkalyq syılyqtar men kádesyılar tabystalyp jatyr.
№621 referendum uchaskesínde alǵashqylardyń bírí bolyp Estıyar Mūǵalbek keldí. Al bıyl alǵash ret dauys beruge qatysqan jas tūrǵyn Elnūr Boranǵazy byulletenín alyp, dauys berdí. Rásímnen keıín olarǵa estelík syılyqtar tabystaldy.
№47 uchaskede qala jastary Azamat pen Saltanat alǵashqy byulleten alyp, ūıymdastyrushylardyń táttí syılyǵyna ıe boldy. Jastardyń aıtuynsha, būl kún olar úshín jańa ómírlík tájírıbege aınaldy.
«Bíz úshín būl óte mańyzdy sát. Elde bolyp jatqan oqıǵalardyń bír bólígí bolu qyzyqty», – dedí olar.
Nauryzbaı audany da belsendílíkten qalys qalmaı otyr. Mūnda audannyń 18 jastaǵy tūrǵyny referendum uchaskesíne tańerteń erte kelgen.
«Men būl kúnníń atmosferasyn sezíníp, el úshín mańyzdy oqıǵaǵa qatysu úshín arnaıy erte keldím», – dedí boıjetken.
Túrksíb audanynda da erekshe atmosfera baıqalady. Keıbír tūrǵyndar úshín 15 nauryz ekí ese sımvoldyq mánge ıe boldy, olar dál referendum ótetín kúní 18 jasqa toldy. Jańa ǵana kámeletke tolǵan jastar mūndaı kúnníń ūzaq uaqyt este qalatynyn aıtady.
Komıssıya músheleríníń aıtuynsha, uchaskelerde jas saılaushylarǵa dauys beru tártíbí túsíndírílíp, barlyq qajettí aqparat berílíp jatyr. Al estelík kádesyılar, shaǵyn syılyqtar men fotoaımaqtar būl kúnníń erekshe atmosferasyn kúsheıtíp, ásírese alǵash ret dauys beruge qatysqan jastar úshín ūmytylmas sátke aınalyp otyr.