Almatyda kremnıı klasterín damytu jobasyna arnalǵan 2030 jylǵa deıíngí uaqyt kapsulasy qoıyldy, dep habarlaıdy aqshamnews.kz
Keshe Almaty qalasyndaǵy Innovatsıyalyq tehnologıyalar parkí arnaıy ekonomıkalyq aımaǵynda (AEA «ITP») 2030 jylǵa deıíngí uaqyt kapsulasyn saltanatty túrde qoyu rásímí óttí. Būl oqıǵa Qazaqstannyń kremnıı klasterín damytu jobasynyń praktıkalyq kezeńge ótkenín aıqyndaıtyn mańyzdy tarıhı sát retínde baǵalanyp otyr.
Joba elímízde joǵary tehnologıyalyq óndírístíń tolyq tsıklín qalyptastyrudy kózdeıdí. Óndírístík tízbek myna negízgí baǵyttardy qamtıdy:
-
jelílík kvarts óndíru;
-
metallurgıyalyq kremnıı óndíru;
-
polıkrıstaldyq kremnıı óndíru;
-
monokrıstaldyq kremnıı ósíru;
-
jartylaı ótkízgísh plastınalar (wafer) óndíru;
-
fotoelektrlík elementter shyǵaru;
-
kún panelderín óndíru.
Josparǵa sáıkes, 2026 jyldyń qazan aıyna deıín AEA «ITP» aumaǵynda jylyna 1 GVt jartylaı ótkízgísh plastınalar óndíretín zauyt íske qosylady. Keıín óndírís kólemín 2 GVt-qa deıín ūlǵaıtu kózdelíp otyr. Būl Qazaqstandy Ortalyq Azıyadaǵy joǵary tehnologıyalyq materıaldar óndírísíníń jetekshí ortalyqtarynyń bíríne aınaldyruǵa múmkíndík beredí.
Sonymen qatar, Qazaqstan Respublıkasy Prezıdentíníń janyndaǵy Ūlttyq ǵylym akademıyasymen bírlesíp kremnııdí 99,9999999999% (12N) deńgeıíne deıín tereń tazartuǵa arnalǵan zerthana qūru josparlanǵan. Mūndaı joǵary tazalyqtaǵy kremnıı álemde sırek óndíríledí jáne strategıyalyq mańyzy zor salalarda qoldanylady:
-
mıkroelektronıka jáne ıntegraldyq shemalar óndírísí;
-
kvanttyq tehnologıyalar;
-
fotonıka jáne optoelektronıka;
-
ǵarysh jáne qorǵanys elektronıkasy.
Saltanatty rásímge ǵylymı jáne óndírístík salanyń kórnektí ókílderí qatysty. Olardyń qatarynda Qazaqstan Respublıkasy Prezıdentíníń janyndaǵy Ūlttyq ǵylym akademıyasynyń prezıdentí Ahylbek Qajyūly Kúríshbaev, akademık, fızıka-matematıka ǵylymdarynyń doktory Asqar Serqūlūly Jūmadíldaev, AEA «ITP» bas dırektory Almas Úskenbaıūly Madıev jáne jobanyń bastamashysy, «DOC Co. LTD» JShS bas dırektory Mūrat Qūsmanūly Rahımjanov bar.
Kremnıı klasterín damytu jobasy — Qazaqstannyń tehnologıyalyq táuelsízdígín kúsheıtuge baǵyttalǵan auqymdy bastama. Jobany íske asyru nátıjesínde el ekonomıkasynda joǵary qosylǵan qūny bar óním óndírísí artyp, ǵylymı-zertteu áleuetí men ónerkásíptík kooperatsıya jańa deńgeıge kóteríledí.
2030 jylǵa deıíngí uaqyt kapsulasy — búgín bastalǵan írí ındustrıyalyq serpílístíń sımvoly. Ol bolashaq ūrpaqqa elímízdíń ǵylym men tehnologıya salasyndaǵy batyl qadamdarynyń tarıhı belgísí retínde saqtalmaq.
