Memleket basshysy Qasym-Jomart Toqaevtyń Almaty qalasyn "ūıyqtamaıtyn" megapolıske aınaldyru jóníndegí tapsyrmasyna sáıkes, qalada táulík boıy jūmys ísteıtín mádenı nysandardyń sany kezeń-kezeńímen kóbeıíp keledí. Osy bastama ayasynda aqpan aıynan bastap Almatydaǵy taǵy 2 kítaphana 24/7 formatta jūmys ísteuge kóshedí. Būl turaly Óńírlík kommunıkatsıyalar qyzmetínde ótken brıfıngte Almaty qalasy Mádenıet basqarmasynyń basshysy Danıyar Álıev málímdedí.
Búgíngí tańda basqarmaǵa qarasty Almaty qalasy Ortalyqtandyrylǵan kítaphana júıesíne 30 qalalyq kítaphana kíredí. Barlyq kítaphanadaǵy jalpy kítap qory 1 372 423 danaǵa jetken.
"Qalalyq kítaphanalar zamanauı talaptarǵa saı jańaryp, tūrǵyndar úshín qoljetímdí mádenı árí zıyatkerlík keńístíkke aınalyp keledí. 2025 jyly kítaphanalarǵa kelushíler sany shamamen 3,1 mıllıon bolsa, al tūraqty oqyrmandar sany 300 myńnan asty", – dedí Danıyar Álıev.
Qazírgí tańda Jambyl atyndaǵy jasóspírímder kítaphanasy, "Alatau Creative Hub" jáne Mūhtar Áuezov atyndaǵy kítaphana táulík boıy qyzmet kórsetedí. Jūmys rejımí ózgergennen keıín būl úsh fılıalǵa kelushíler sany 70 paıyzǵa artqan. Osy tájírıbení eskere otyryp, aqpan aıynda Qazaqstan jazushylar kítaphanasy men Rozybakıev kóshesí, 247 mekenjaıynda ornalasqan fılıaly 24/7 rejımínde jūmys ísteuge kóshedí.
Sonymen qatar, qalada kítaphana qyzmetíníń qoljetímdílígín arttyru maqsatynda sauda ortalyqtarynda, metro beketterínde, mektepterde, kovorkıngter men kommunaldyq ortalyqtarda 32 derbes ózíne-ózí qyzmet kórsetu kítaphanasy ornatylǵan. Būl núktelerdí 300-ge juyq tūraqty oqyrman paıdalanady, aı saıyn 500-den astam kítap beríledí.
Kítaphanalardy jańǵyrtu jūmystary júıelí túrde júrgízílíp keledí. 2025-2026 jyldary jańa qalalyq 2 kítaphana ashylsa, bıyl jyl sońyna deıín az qamtylǵan audandarda taǵy 3 jańa kítaphana ashu josparlanyp otyr.
Kítap qoryn tsıfrlandyru baǵytynda da auqymdy jūmystar atqaryluda. 2025 jyly skanerleu tehnıkasynyń kómegímen 70 paıyz kítap qory tsıfrlandyrylyp, 2027 jyldyń sońyna deıín barlyq kítap qoryn tolyq tsıfrlandyru josparlanuda.
Būdan bólek, Ortalyqtandarylǵan kítaphana júıesínde sırek kítaptardy qalpyna keltíru zerthanasy jūmys ísteıdí. Búgínge deıín 335 kítap restavratsıyadan ótíp, onyń 65-í sırek basylymdar qataryna jatady.
Inklyuzıvtí orta qalyptastyru maqsatynda Ortalyqtandarylǵan kítaphana júıesíníń 8 fılıalynda kóru qabíletí tómen azamattarǵa arnalǵan audıo dybys jáne Braıl dıspleıí arqyly aqparat aluǵa múmkíndík beretín arnaıy jūmys oryndary jabdyqtalǵan. Sondaı-aq, Yandeks Qazaqstan kompanıyasymen bírlesíp, múmkíndígí shekteulí jandar úshín tegín kítap jetkízu qyzmetí íske qosylǵan.
Almaty qalasynyń kítaphanalary osylaısha zamanauı formatta damyp, tūrǵyndardyń bílímge, mádenıetke jáne aqparatqa táulík boıy qol jetkízuíne jaǵdaı jasap otyr.